manzur hai napna kamar ka

manzūr hai nāpnā kamar kā

paimāna banā.iye nazar kā

thā shaam se daġhdaġha sahar kā

dhaḌkā hī lagā rahā gajar kā

siine meñ se kuchh aa.ī āvāz

phūTā koī aabla jigar kā

aañsū puchh.enge kab tak ahbāb

Tapkā na rukegā chashm-e-tar kā

dil hī to hai kyā ajab bahal jaa.e

kuchh zikr karo idhar-udhar kā

kyuuñ zulf darāz kholte ho

kyā ḳhauf tumheñ nahīñ kamar kā

kuchh be-adabī huī muqarrar

siina bedhā gayā ghar kā

tanhā nahīñ gosha-e-qafas bhī

jhagḌā hai saath bāl-o-par kā

muhtāj-e-kafan nahīñ hai bulbul

parda kaafī hai bāl-o-par kā

rahte nahīñ ek dam kisī jā

batlā.eñ nishān-e-ḳhāk ghar kā

kyā kyā ham ne na ḳhaak uḌaa.ī

paayā na ġhubār tere dar kā

ho aap ke kaan tak rasā.ī

allāh ye martaba ghar kā

ai dil kunj-e-mazār dekhā

pahlā ye maqām hai safar kā

yāqūt kahāñ mire dhun meñ

TukḌā hogā koī jigar kā

ruḳhsat ruḳhsat jo kah rahe ho

ai jān-e-ḳhayāl hai kidhar kā

jab tak hai kuchh hayāt baaqī

rasta dekheñge nāma-bar kā

āñkhoñ meñ ḳhayāl aur hī hai

jalva kiyā dekhiye qamar kā

ārām kahāñ nasīb ham ko

khaTkā darpesh hai safar kā

pahuñche mire haath tak to fassād

muñh laal karūñgā neshtar kā

dauḌe lene qadam ajal ke

dhokā huā yaar kī ḳhabar kā

Thahro lāsha uThe to jaanā

jhagḌā hai aur do pahar kā

kyuuñ aa.e 'nasīm' niiñd ham ko

sar rakh ke zamīñ pe yaar sarkā

manzur hai napna kamar ka

paimana banaiye nazar ka

tha sham se daghdagha sahar ka

dhaDka hi laga raha gajar ka

sine mein se kuchh aai aawaz

phuTa koi aabla jigar ka

aansu puchhenge kab tak ahbab

Tapka na rukega chashm-e-tar ka

dil hi to hai kya ajab bahal jae

kuchh zikr karo idhar-udhar ka

kyun zulf daraaz kholte ho

kya KHauf tumhein nahin kamar ka

kuchh be-adabi hui muqarrar

sina bedha gaya ghar ka

tanha nahin gosha-e-qafas bhi

jhagDa hai sath baal-o-par ka

muhtaj-e-kafan nahin hai bulbul

parda kafi hai baal-o-par ka

rahte nahin ek dam kisi ja

batlaen nishan-e-KHak ghar ka

kya kya hum ne na KHak uDai

paya na ghubar tere dar ka

ho aap ke kan tak rasai

allah ye martaba ghar ka

ai dil kunj-e-mazar dekha

pahla ye maqam hai safar ka

yaqut kahan mere dhun mein

TukDa hoga koi jigar ka

ruKHsat ruKHsat jo kah rahe ho

ai jaan-e-KHayal hai kidhar ka

jab tak hai kuchh hayat baqi

rasta dekhenge nama-bar ka

aankhon mein KHayal aur hi hai

jalwa kiya dekhiye qamar ka

aaram kahan nasib hum ko

khaTka darpesh hai safar ka

pahunche mere hath tak to fassad

munh lal karunga neshtar ka

dauDe lene qadam ajal ke

dhoka hua yar ki KHabar ka

Thahro lasha uThe to jaana

jhagDa hai aur do pahar ka

kyun aae 'nasim' nind hum ko

sar rakh ke zamin pe yar sarka