maqam aur bhi aaenge la-makan ke baad

maqām aur bhī ā.eñge lā-makān ke baad

zarūr hoñge jahāñ aur is jahān ke baad

shikasta par the mire aur ḳhatm thī parvāz

ik āsmān thā baaqī ik āsmān ke baad

jo kāmyābī milī vo hameñ ubūrī milī

kuchh imtihān the baaqī har imtihān ke baad

vo jaisā tai thā vahāñ kuchh bhī to na thā aisā

nishān koī nahīñ thā us ik nishān ke baad

zavāl aisā ki saare farāz past hue

nasheb-e-vahm bahut thā hadd-e-gumān ke baad

tavaqqo us kī thī mahdūd maiñ bhī chup hī rahā

safar ke aur bhī tohfe the armuġhān ke baad

vo pahlā ziina thā manzil jise abas jaanā

kuchh āgahī ke marāhil the aur dhyān ke baad

ik us kā TūTnā goyā shikast merī thī

chalā na tiir koī mujh se us kamān ke baad

rahā vo josh na vo daad hī rahī 'betāb'

sukūt rah gayā phir ḳhatm dāstān ke baad

maqam aur bhi aaenge la-makan ke baad

zarur honge jahan aur is jahan ke baad

shikasta par the mere aur KHatm thi parwaz

ek aasman tha baqi ek aasman ke baad

jo kaamyabi mili wo hamein uburi mili

kuchh imtihan the baqi har imtihan ke baad

wo jaisa tai tha wahan kuchh bhi to na tha aisa

nishan koi nahin tha us ek nishan ke baad

zawal aisa ki sare faraaz past hue

nasheb-e-wahm bahut tha hadd-e-guman ke baad

tawaqqo us ki thi mahdud main bhi chup hi raha

safar ke aur bhi tohfe the armughan ke baad

wo pahla zina tha manzil jise abas jaana

kuchh aagahi ke marahil the aur dhyan ke baad

ek us ka TuTna goya shikast meri thi

chala na tir koi mujh se us kaman ke baad

raha wo josh na wo dad hi rahi 'betab'

sukut rah gaya phir KHatm dastan ke baad