maqam-e-hosh se guzra makan se la-makan pahuncha

maqām-e-hosh se guzrā makāñ se lā-makāñ pahuñchā

tumhāre ishq meñ dīvāna-e-manzil kahāñ pahuñchā

nazar kī manziloñ meñ bas tumhīñ husn-e-mujassam the

matā-e-ārzū le kar maiñ ulfat meñ jahāñ pahuñchā

usī ne ishq ban kar do-jahāñ ko phūñk Daalā hai

vo sho.ala jo tirī nazroñ se dil ke darmiyāñ pahuñchā

junūñ zāhir huā ruḳh par ḳhudī par be-ḳhudī chhā.ī

ba-qaid-e-hosh maiñ jab bhī qarīb-e-āstāñ pahuñchā

tum apnī justujū meñ ye mirā shauq-e-talab dekho

tumhāre ishq meñ luT kar bhī tum tak jān-e-jāñ pahuñchā

ta.alluq toḌ kar jān-e-jahāñ saare zamāne se

maiñ pahuñchā thā jahāñ mujh ko tirī ḳhātir vahāñ pahuñchā

'fanā' vo jalva-gar hone lage har bazm-e-īmāñ meñ

mirā dil le ke jab mujh ko sar-e-kū-e-butāñ pahuñchā

maqam-e-hosh se guzra makan se la-makan pahuncha

tumhaare ishq mein diwana-e-manzil kahan pahuncha

nazar ki manzilon mein bas tumhin husn-e-mujassam the

mata-e-arzu le kar main ulfat mein jahan pahuncha

usi ne ishq ban kar do-jahan ko phunk Dala hai

wo shoala jo teri nazron se dil ke darmiyan pahuncha

junun zahir hua ruKH par KHudi par be-KHudi chhai

ba-qaid-e-hosh main jab bhi qarib-e-astan pahuncha

tum apni justuju mein ye mera shauq-e-talab dekho

tumhaare ishq mein luT kar bhi tum tak jaan-e-jaan pahuncha

talluq toD kar jaan-e-jahan sare zamane se

main pahuncha tha jahan mujh ko teri KHatir wahan pahuncha

'fana' wo jalwa-gar hone lage har bazm-e-iman mein

mera dil le ke jab mujh ko sar-e-ku-e-butan pahuncha