maqam-e-shauq se aage bhi ek rasta nikalta hai
maqām-e-shauq se aage bhī ik rasta nikaltā hai
kaheñ kyā silsila dil kā kahāñ par jā nikaltā hai
mizha tak aatā jaatā hai badan kā sab lahū khiñch kar
kabhī kyā is tarah bhī yaad kā kāñTā nikaltā hai
dukān-e-dil baḌhāte haiñ hisāb-e-besh-o-kam kar lo
hamāre naam par jis jis kā bhī jitnā nikaltā hai
abhī hai husn meñ husn-e-nazar kī kār-farmā.ī
abhī se kyā batā.eñ ham ki vo kaisā nikaltā hai
miyān-e-shahr haiñ yā ā.inoñ ke rū-ba-rū haiñ ham
jise bhī dekhte haiñ kuchh hamīñ jaisā nikaltā hai
ye dil kyuuñ Duub jaatā hai usī se pūchh lūñgā maiñ
sitāra shām-e-hijrāñ kā idhar bhī aa nikaltā hai
dil-e-muztar vafā ke baab meñ ye jald-bāzī kyā
zarā ruk jaa.eñ aur dekheñ natīja kyā nikaltā hai
maqam-e-shauq se aage bhi ek rasta nikalta hai
kahen kya silsila dil ka kahan par ja nikalta hai
mizha tak aata jata hai badan ka sab lahu khinch kar
kabhi kya is tarah bhi yaad ka kanTa nikalta hai
dukan-e-dil baDhate hain hisab-e-besh-o-kam kar lo
hamare nam par jis jis ka bhi jitna nikalta hai
abhi hai husn mein husn-e-nazar ki kar-farmai
abhi se kya bataen hum ki wo kaisa nikalta hai
miyan-e-shahr hain ya aainon ke ru-ba-ru hain hum
jise bhi dekhte hain kuchh hamin jaisa nikalta hai
ye dil kyun Dub jata hai usi se puchh lunga main
sitara sham-e-hijran ka idhar bhi aa nikalta hai
dil-e-muztar wafa ke bab mein ye jald-bazi kya
zara ruk jaen aur dekhen natija kya nikalta hai
This content features in following collection(s)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
