maqam-o-ab hue sath sath sharminda

maqām-o-āb hue saath saath sharminda

hai karbalā jo pashemāñ furāt sharminda

lahū meñ Duub ke mazlūm surḳh-rū nikle

salīb-e-vaqt pe zālim kī zaat sharminda

jab ik jihat se chalā tiir nanhe bachche par

us ek pal meñ hue shash-jahāt sharminda

kahāñ hai shimr ko taufīq sharmsārī kī

magar hai ḳhanjar-e-qātil kī dhaat sharminda

gireñ jo kaT ke vahī sar-buland haiñ baazū

jo tiir mashk pe khīñcheñ vo haath sharminda

lahū-luhān shahīdoñ se sharmsār vo din

vo bībiyoñ ke khule sar kī raat sharminda

haiñ sar jhukā.e hue lafz lafz nauhoñ ke

bayān-e-marsiya kī baat baat sharminda

yazīd-o-shimr-o-amar aur bin-ziyād kahāñ

sivā.e hur ke huī sab kī zaat sharminda

fanā ke āḳhirī lamhe talak husain mire

rahegī ġham meñ tire kā.enāt sharminda

maqam-o-ab hue sath sath sharminda

hai karbala jo pasheman furaat sharminda

lahu mein Dub ke mazlum surKH-ru nikle

salib-e-waqt pe zalim ki zat sharminda

jab ek jihat se chala tir nanhe bachche par

us ek pal mein hue shash-jahat sharminda

kahan hai shimr ko taufiq sharmsari ki

magar hai KHanjar-e-qatil ki dhat sharminda

giren jo kaT ke wahi sar-buland hain bazu

jo tir mashk pe khinchen wo hath sharminda

lahu-luhan shahidon se sharmsar wo din

wo bibiyon ke khule sar ki raat sharminda

hain sar jhukae hue lafz lafz nauhon ke

bayan-e-marsiya ki baat baat sharminda

yazid-o-shimr-o-amar aur bin-ziyaad kahan

siwae hur ke hui sab ki zat sharminda

fana ke aaKHiri lamhe talak husain mere

rahegi gham mein tere kaenat sharminda