maqsad-e-zindagi DhunDhta rah gaya

maqsad-e-zindagī DhūñDhtā rah gayā

ik sirā jab milā dūsrā rah gayā

imtihāñ ke liye aur kyā rah gayā

ai ḳhudā bas tirā aasrā rah gayā

aise rakhā gayā mujh ko tasvīr meñ

zindagī bhar mirā sar jhukā rah gayā

ḳhud bhī shāmil rahā DhūñDne meñ use

umr bhar jis ko maiñ DhūñDhtā rah gayā

vaqt kī dhuup meñ miT ga.e sab nishāñ

dil ke kāġhaz pe bas naam kā rah gayā

muñh chhupā.e havā dekhtī rah ga.ī

hausla jis meñ thā vo diyā rah gayā

jis shajar se achānak parinde uḌe

vo shajar der tak kāñptā rah gayā

jab musībat kabhī ḳhud pe 'ahyā' paḌī

falsafa sab dharā kā dharā rah gayā

maqsad-e-zindagi DhunDhta rah gaya

ek sira jab mila dusra rah gaya

imtihan ke liye aur kya rah gaya

ai KHuda bas tera aasra rah gaya

aise rakha gaya mujh ko taswir mein

zindagi bhar mera sar jhuka rah gaya

KHud bhi shamil raha DhunDne mein use

umr bhar jis ko main DhunDhta rah gaya

waqt ki dhup mein miT gae sab nishan

dil ke kaghaz pe bas nam ka rah gaya

munh chhupae hawa dekhti rah gai

hausla jis mein tha wo diya rah gaya

jis shajar se achanak parinde uDe

wo shajar der tak kanpta rah gaya

jab musibat kabhi KHud pe 'ahya' paDi

falsafa sab dhara ka dhara rah gaya