maqsad hasil nahin ho ya ho

maqsad hāsil nahīñ ho yā ho

jo honā hai jald ai ḳhudā ho

ulfat hai pās-e-vaz.a kā naam

marte mar jaao par nibāho

dil meñ nahīñ ḳhuub mail rakhnā

jo shikva gila ho barmalā ho

kyā hotā hai farsh boriyā se

lāzim hai ki qalb be-riyā ho

ik jaam hī to pilā de lillāh

ai pīr-e-muġhāñ terā bhalā ho

darkār use madad hai kis kī

jis ko allāh kā aasrā ho

us dil kī jalan jo dekh paa.e

sham-e-sozāñ charāġh-pā ho

kyā aur bhalā kahūñ maiñ tum ko

tum hazrat-e-ishq bad-balā ho

kahne ko to kah ga.e ho sab kuchh

ab koī javāb de to kyā ho

dil ziist se sard ho gayā hai

ai soz-e-jigar tirā burā ho

be-aib koī nahīñ hai 'kaifī'

gar ho to vo zāt-e-kibriyā ho

maqsad hasil nahin ho ya ho

jo hona hai jald ai KHuda ho

ulfat hai pas-e-waza ka nam

marte mar jao par nibaho

dil mein nahin KHub mail rakhna

jo shikwa gila ho barmala ho

kya hota hai farsh boriya se

lazim hai ki qalb be-riya ho

ek jam hi to pila de lillah

ai pir-e-mughan tera bhala ho

darkar use madad hai kis ki

jis ko allah ka aasra ho

us dil ki jalan jo dekh pae

sham-e-sozan charagh-pa ho

kya aur bhala kahun main tum ko

tum hazrat-e-ishq bad-bala ho

kahne ko to kah gae ho sab kuchh

ab koi jawab de to kya ho

dil zist se sard ho gaya hai

ai soz-e-jigar tera bura ho

be-aib koi nahin hai 'kaifi'

gar ho to wo zat-e-kibriya ho