mar kar mariz-e-gham ki wo haalat nahin rahi

mar kar marīz-e-ġham kī vo hālat nahīñ rahī

yā'nī vo iztirāb kī sūrat nahīñ rahī

har lamha-e-hayāt rahā vaqf kār-e-shauq

marne kī 'umr bhar mujhe fursat nahīñ rahī

ek nāla-e-ḳhamosh musalsal hai aur ham

yādash-ba-ḳhair zabt kī tāqat nahīñ rahī

vo ahd-e-dil-farebi-e-tāsīr ab kahāñ

muddat se aah aah kī hasrat nahīñ rahī

dil aur havā-e-silsila-e-jambāni-e-nashāt

kyuuñ pās-e-vaz-e-ġham tujhe ġhairat nahīñ rahī

har be-gunāh se vāda-e-baḳhshish hai roz-e-hashr

goyā gunāh kī bhī zarūrat nahīñ rahī

ai arz-e-shauq muzhda ki dil chaak ho gayā

taklīf parda-dāri-e-hasrat nahīñ rahī

pathrā ga.ī thī aañkh magar band to na thī

ab ye bhī intizār kī sūrat nahīñ rahī

'ibrat ne bekasī kā nishāñ bhī miTā diyā

uḌtī thī jis pe ḳhaak vo turbat nahīñ rahī

mahshar meñ bhī vo 'ahd-e-vafā se mukar ga.e

jis kī ḳhushī thī ab vo qayāmat nahīñ rahī

kis muñh se ġham ke zabt kā dā'vā kare koī

tāqat ba-qadr-e-hasrat-e-rāhat nahīñ rahī

'fānī' umīd-e-marg ne bhī de diyā javāb

jiine kī hijr meñ koī sūrat nahīñ rahī

mar kar mariz-e-gham ki wo haalat nahin rahi

ya'ni wo iztirab ki surat nahin rahi

har lamha-e-hayat raha waqf kar-e-shauq

marne ki 'umr bhar mujhe fursat nahin rahi

ek nala-e-KHamosh musalsal hai aur hum

yaadash-ba-KHair zabt ki taqat nahin rahi

wo ahd-e-dil-farebi-e-tasir ab kahan

muddat se aah aah ki hasrat nahin rahi

dil aur hawa-e-silsila-e-jambani-e-nashat

kyun pas-e-waz-e-gham tujhe ghairat nahin rahi

har be-gunah se wada-e-baKHshish hai roz-e-hashr

goya gunah ki bhi zarurat nahin rahi

ai arz-e-shauq muzhda ki dil chaak ho gaya

taklif parda-dari-e-hasrat nahin rahi

pathra gai thi aankh magar band to na thi

ab ye bhi intizar ki surat nahin rahi

'ibrat ne bekasi ka nishan bhi miTa diya

uDti thi jis pe KHak wo turbat nahin rahi

mahshar mein bhi wo 'ahd-e-wafa se mukar gae

jis ki KHushi thi ab wo qayamat nahin rahi

kis munh se gham ke zabt ka da'wa kare koi

taqat ba-qadr-e-hasrat-e-rahat nahin rahi

'fani' umid-e-marg ne bhi de diya jawab

jine ki hijr mein koi surat nahin rahi