mar mar gae nazar kar uske barahna tan mein

mar mar ga.e nazar kar us ke barahna tan meñ

kapḌe utāre un ne sar khīñche ham kafan meñ

gul phuul se kab us bin lagtī haiñ apnī āñkheñ

laa.ī bahār ham ko zor-āvarī chaman meñ

ab lāl-e-nau-ḳhat us ke kam baḳhshte haiñ farhat

quvvat kahāñ rahe hai yāqūti-e-kuhan meñ

yūsuf azīz-e-dilā jā misr meñ huā thā

pākīza gauharoñ kī 'izzat nahīñ vatan meñ

dair o haram se tū to Tuk garm-e-nāz niklā

hangāma ho rahā hai ab shaiḳh o barhaman meñ

aa jaate shahr meñ tū jaise ki āñdhī aa.ī

kyā vahshateñ kiyā haiñ ham ne divānpan meñ

haiñ ghaav dil par apne teġh-e-zabāñ se sab kī

tab dard hai hamāre ai 'mīr' har suḳhan meñ

mar mar gae nazar kar us ke barahna tan mein

kapDe utare un ne sar khinche hum kafan mein

gul phul se kab us bin lagti hain apni aankhen

lai bahaar hum ko zor-awari chaman mein

ab lal-e-nau-KHat us ke kam baKHshte hain farhat

quwwat kahan rahe hai yaquti-e-kuhan mein

yusuf aziz-e-dila ja misr mein hua tha

pakiza gauharon ki 'izzat nahin watan mein

dair o haram se tu to Tuk garm-e-naz nikla

hangama ho raha hai ab shaiKH o barhaman mein

aa jate shahr mein tu jaise ki aandhi aai

kya wahshaten kiya hain hum ne diwanpan mein

hain ghaw dil par apne tegh-e-zaban se sab ki

tab dard hai hamare ai 'mir' har suKHan mein