mar rahte jo gul bin to sara ye KHalal jata

mar rahte jo gul bin to saarā ye ḳhalal jaatā

niklā hī na jī varna kāñTā sā nikal jaatā

paidā hai ki pinhāñ thī ātish-nafsī merī

maiñ zabt na kartā to sab shahr ye jal jaatā

maiñ girya-e-ḳhūnīñ ko roke hī rahā varna

ik dam meñ zamāne kā yaañ rañg badal jaatā

bin pūchhe karam se vo jo baḳhsh na detā to

pursish meñ hamārī hī din hashr kā Dhal jaatā

istāda jahāñ meñ thā maidān-e-mohabbat meñ

vaañ rustam agar aatā to dekh ke Tal jaatā

vo sair kā vaadī ke maa.il na huā varna

āñkhoñ ko ġhazāloñ kī paañv tale mal jaatā

be-tāb-o-tavāñ yuuñ maiñ kaahe ko talaf hotā

yāqūtī tire lab kī miltī to sambhal jaatā

us sīm-badan ko thī kab tāb-e-tāb itnī

vo chāndnī meñ shab kī hotā to pighal jaatā

maarā gayā tab guzrā bose se tire lab ke

kyā 'mīr' bhī laḌkā thā bātoñ meñ bahal jaatā

mar rahte jo gul bin to sara ye KHalal jata

nikla hi na ji warna kanTa sa nikal jata

paida hai ki pinhan thi aatish-nafsi meri

main zabt na karta to sab shahr ye jal jata

main girya-e-KHunin ko roke hi raha warna

ek dam mein zamane ka yan rang badal jata

bin puchhe karam se wo jo baKHsh na deta to

pursish mein hamari hi din hashr ka Dhal jata

istada jahan mein tha maidan-e-mohabbat mein

wan rustam agar aata to dekh ke Tal jata

wo sair ka wadi ke mail na hua warna

aankhon ko ghazalon ki panw tale mal jata

be-tab-o-tawan yun main kahe ko talaf hota

yaquti tere lab ki milti to sambhal jata

us sim-badan ko thi kab tab-e-tab itni

wo chandni mein shab ki hota to pighal jata

mara gaya tab guzra bose se tere lab ke

kya 'mir' bhi laDka tha baaton mein bahal jata