maraz aisa hai ki jis ki dawa hone nahin wali

maraz aisā hai ki jis kī davā hone nahīñ vaalī

kisī bhī haal meñ tum se vafā hone nahīñ vaalī

mire hisse ke jo bhī jaam haiñ vo sāmne rakh do

mire hoñToñ se koī iltijā hone nahīñ vaalī

hameñ hī DhūñDne haiñ rāste ḳhud apnī manzil ke

ye duniyā to hamārī rahnumā hone nahīñ vaalī

mujhe mālūm hai sab kuchh yahīñ rah jā.egā ik din

mirī ḳhvāhish kabhī had se sivā hone nahīñ vaalī

ham āshiq haiñ chaḌhā diije salīb-o-dār par lekin

namāz-e-ishq to ham se qazā hone nahīñ vaalī

abhī kuchh aur pech-o-ḳham bhī nikleñge mohabbat meñ

ye kis ne kah diyā ham se ḳhatā hone nahīñ vaalī

maraz aisa hai ki jis ki dawa hone nahin wali

kisi bhi haal mein tum se wafa hone nahin wali

mere hisse ke jo bhi jam hain wo samne rakh do

mere honTon se koi iltija hone nahin wali

hamein hi DhunDne hain raste KHud apni manzil ke

ye duniya to hamari rahnuma hone nahin wali

mujhe malum hai sab kuchh yahin rah jaega ek din

meri KHwahish kabhi had se siwa hone nahin wali

hum aashiq hain chaDha dije salib-o-dar par lekin

namaz-e-ishq to hum se qaza hone nahin wali

abhi kuchh aur pech-o-KHam bhi niklenge mohabbat mein

ye kis ne kah diya hum se KHata hone nahin wali