maraz-e-ishq mein mujh sa bhi giraftar na ho

maraz-e-ishq meñ mujh sā bhī giraftār na ho

dost to dost hai dushman ko ye āzār na ho

hosh se kaam lo anjām ko dekho muusā

tuur kī ḳhair nahīñ tālib-e-dīdār na ho

ye bhī ehsāñ hai agar haath sitam se khīñcho

na karo mehr-o-vafā dar-pa-e-āzār na ho

fātiha qabr pe aa.e ho to paḌhte jaao

tab-e-nāzuk pe agar lutf-o-karam baar na ho

dil-e-insāf-talab gher ke laayā hai jahāñ

yā-ilāhī ye kahīñ husn kī sarkār na ho

jurm vo jurm hai jo jurm kī had meñ na rahe

ma.asiyat kā hai maza jab ki gunahgār na ho

lutf jiine kā na marne kā maza miltā hai

hoñ maraz laakh magar ishq kā āzār na ho

haa.e jāñ-bāzoñ kī mahrūmī-e-qismat 'mas.ūd'

ma.arke meñ jo kisī haath meñ talvār na ho

maraz-e-ishq mein mujh sa bhi giraftar na ho

dost to dost hai dushman ko ye aazar na ho

hosh se kaam lo anjam ko dekho musa

tur ki KHair nahin talib-e-didar na ho

ye bhi ehsan hai agar hath sitam se khincho

na karo mehr-o-wafa dar-pa-e-azar na ho

fatiha qabr pe aae ho to paDhte jao

tab-e-nazuk pe agar lutf-o-karam bar na ho

dil-e-insaf-talab gher ke laya hai jahan

ya-ilahi ye kahin husn ki sarkar na ho

jurm wo jurm hai jo jurm ki had mein na rahe

masiyat ka hai maza jab ki gunahgar na ho

lutf jine ka na marne ka maza milta hai

hon maraz lakh magar ishq ka aazar na ho

hae jaan-bazon ki mahrumi-e-qismat 'masud'

marke mein jo kisi hath mein talwar na ho