marg-e-ashiq par farishta maut ka badnam tha

marg-e-āshiq par farishta maut kā badnām thā

vo hañsī roke hue baiThā thā jis kā kaam thā

ḳhūn-e-nāhaq se mukarne kā kahāñ hañgām thā

tiir jitne dil se nikle sab par un kā naam thā

kyā batā.ī jaa.eñ shām-e-hijr kī majbūriyāñ

dil hamārā thā na ham dil ke ajab hañgām thā

hijr kī do karvaToñ ne kar diyā qissa tamām

dard-e-dil āġhāz thā dard-e-jigar anjām thā

aise vaqtoñ meñ kaleja ġham se ho jaatā hai shaq

sabr apne dil kī mayyat par hamārā kaam thā

ahl-e-mahshar dekh luuñ qātil ko to pahchān luuñ

bholī bholī shakl thī aur kuchh bhalā sā saam thā

ab koī dīvāna kahtā hai koī vahshī mujhe

aap kī ulfat se pahle merā 'manzar' naam thā

marg-e-ashiq par farishta maut ka badnam tha

wo hansi roke hue baiTha tha jis ka kaam tha

KHun-e-nahaq se mukarne ka kahan hangam tha

tir jitne dil se nikle sab par un ka nam tha

kya batai jaen sham-e-hijr ki majburiyan

dil hamara tha na hum dil ke ajab hangam tha

hijr ki do karwaTon ne kar diya qissa tamam

dard-e-dil aaghaz tha dard-e-jigar anjam tha

aise waqton mein kaleja gham se ho jata hai shaq

sabr apne dil ki mayyat par hamara kaam tha

ahl-e-mahshar dekh lun qatil ko to pahchan lun

bholi bholi shakl thi aur kuchh bhala sa sam tha

ab koi diwana kahta hai koi wahshi mujhe

aap ki ulfat se pahle mera 'manzar' nam tha