marg-e-aghyar lab pe la na saka

marg-e-aġhyār lab pe lā na sakā

vo qasam huuñ jo yaar khā na sakā

is qadar zo.af thā ki terā naaz

thī tamannā magar uThā na sakā

mar ke ThanDā kahīñ na ho jaa.e

is liye vo mujhe jilā na sakā

buḳhl dekho to merī turbat par

ek aañsū bhī vo girā na sakā

uTh na jaa.e raqīb mahfil se

mujh ko pahlū meñ vo biThā na sakā

thā jo ashk-e-azīz ḳhātir meñ

dīda-e-tar mujhe bahā na sakā

husn terā vo māh-e-tābāñ thā

abr-e-gesū jise chhupā na sakā

dār-e-fānī maqām-e-laġhzish hai

koī apnā qadam jamā na sakā

na milā koī vaqt-e-tanhā.ī

hāl-e-dil yaar ko sunā na sakā

jāntā thā paḌe raheñge vahīñ

is liye yaar ghar batā na sakā

na manā laḌ ke vo bahut chāhā

aise bigḌe ki phir banā na sakā

dekh kar bad-dimāġhiyāñ un kī

nāma-bar ḳhat mirā paḌhā na sakā

kis tarah arz-e-mudda.ā kartā

ġhair ko paas se haTā na sakā

ārzū-mand rah gayā majnūñ

mere aage faroġh pā na sakā

kiina shauq-e-raqīb thā ai dost

ki tabī.at se terī jā na sakā

kyā nadāmat huī hai qātil se

nāz-e-ḳhanjar gulū uThā na sakā

ḳhauf thā ġhash unheñ na aa jaa.e

maiñ shigāf-e-jigar dikhā na sakā

nā-tavāñ thā 'nasīm' is darja

ki vo zanjīr-e-pā hilā na sakā

marg-e-aghyar lab pe la na saka

wo qasam hun jo yar kha na saka

is qadar zoaf tha ki tera naz

thi tamanna magar uTha na saka

mar ke ThanDa kahin na ho jae

is liye wo mujhe jila na saka

buKHl dekho to meri turbat par

ek aansu bhi wo gira na saka

uTh na jae raqib mahfil se

mujh ko pahlu mein wo biTha na saka

tha jo ashk-e-aziz KHatir mein

dida-e-tar mujhe baha na saka

husn tera wo mah-e-taban tha

abr-e-gesu jise chhupa na saka

dar-e-fani maqam-e-laghzish hai

koi apna qadam jama na saka

na mila koi waqt-e-tanhai

haal-e-dil yar ko suna na saka

jaanta tha paDe rahenge wahin

is liye yar ghar bata na saka

na mana laD ke wo bahut chaha

aise bigDe ki phir bana na saka

dekh kar bad-dimaghiyan un ki

nama-bar KHat mera paDha na saka

kis tarah arz-e-muddaa karta

ghair ko pas se haTa na saka

aarzu-mand rah gaya majnun

mere aage farogh pa na saka

kina shauq-e-raqib tha ai dost

ki tabiat se teri ja na saka

kya nadamat hui hai qatil se

naz-e-KHanjar gulu uTha na saka

KHauf tha ghash unhen na aa jae

main shigaf-e-jigar dikha na saka

na-tawan tha 'nasim' is darja

ki wo zanjir-e-pa hila na saka