mariz-e-mohabbat unhin ka fasana sunata raha dam nikalte nikalte

marīz-e-mohabbat unhīñ kā fasāna sunātā rahā dam nikalte nikalte

magar zikr shām-e-alam kā jab aayā charāġh-e-sahar bujh gayā jalte jalte

unheñ ḳhat meñ likkhā thā dil muztarib hai javāb un kā aayā mohabbat na karte

tumheñ dil lagāne ko kis ne kahā thā bahal jā.egā dil bahalte bahalte

mujhe apne dil kī to parvā nahīñ hai magar Dar rahā huuñ ki bachpan kī zid hai

kahīñ pā-e-nāzuk meñ moch aa na jaa.e dil-e-saḳht-jāñ ko masalte masalte

bhalā koī vā'da-ḳhilāfī kī had hai hisāb apne dil meñ lagā kar to socho

qayāmat kā din aa gayā rafta rafta mulāqāt kā din badalte badalte

irāda thā tark-e-mohabbat kā lekin fareb-e-tabassum meñ phir aa ga.e ham

abhī khā ke Thokar sañbhalne na paa.e ki phir khaa.ī Thokar sañbhalte sañbhalte

bas ab sabr kar rahrav-e-rāh-e-ulfat ki tere muqaddar meñ manzil nahīñ hai

udhar sāmne sar pe shaam aa rahī hai idhar thak ga.e paañv bhī chalte chalte

vo mehmān mere hue bhī to kab tak huī sham' gul aur na Duube sitāre

'qamar' is qadar un ko jaldī thī ghar kī ki ghar chal diye chāñdnī Dhalte Dhalte

mariz-e-mohabbat unhin ka fasana sunata raha dam nikalte nikalte

magar zikr sham-e-alam ka jab aaya charagh-e-sahar bujh gaya jalte jalte

unhen KHat mein likkha tha dil muztarib hai jawab un ka aaya mohabbat na karte

tumhein dil lagane ko kis ne kaha tha bahal jaega dil bahalte bahalte

mujhe apne dil ki to parwa nahin hai magar Dar raha hun ki bachpan ki zid hai

kahin pa-e-nazuk mein moch aa na jae dil-e-saKHt-jaan ko masalte masalte

bhala koi wa'da-KHilafi ki had hai hisab apne dil mein laga kar to socho

qayamat ka din aa gaya rafta rafta mulaqat ka din badalte badalte

irada tha tark-e-mohabbat ka lekin fareb-e-tabassum mein phir aa gae hum

abhi kha ke Thokar sanbhalne na pae ki phir khai Thokar sanbhalte sanbhalte

bas ab sabr kar rahraw-e-rah-e-ulfat ki tere muqaddar mein manzil nahin hai

udhar samne sar pe sham aa rahi hai idhar thak gae panw bhi chalte chalte

wo mehman mere hue bhi to kab tak hui sham' gul aur na Dube sitare

'qamar' is qadar un ko jaldi thi ghar ki ki ghar chal diye chandni Dhalte Dhalte