masarrat ka hamesha ek hi aalam nahin hota

masarrat kā hamesha ek hī aalam nahīñ hotā

karam hotā to hai un kā magar paiham nahīñ hotā

ḳhushī kā ġham jinheñ hotā hai samjho ġham-nasīb un ko

jinheñ ġham kī ḳhushī hotī hai un ko ġham nahīñ hotā

na le jaatā jo majnūñ ālam-e-dīvāngī ham se

to us kā zikr-e-ḳhair afsāna-e-ālam nahīñ hotā

kahāñ hai tū burā.ī se burā.ī miT nahīñ saktī

are ġhāfil añdhere se añdherā kam nahīñ hotā

yahī vo vaqt hai jab aadmī ko hosh aatā hai

ḳhudā kī yaad se ġhāfil Dil-e-pur-ġham nahīñ hotā

burā jab vaqt aatā hai to is duniyā-e-ulfat meñ

koī monis nahīñ hotā koī hamdam nahīñ hotā

tasallī se kabhī taskīn-e-ḳhātir ho nahīñ saktī

junūn-e-shauq baḌh jaatā hai is se kam nahīñ hotā

fazā-e-bāġh-e-hastī meñ ḳhizāñ bhī hai bahāreñ bhī

kahāñ ḳhushiyāñ nahīñ hotīñ kahāñ mātam nahīñ hotā

nibāh āsāñ nahīñ duniyā kī rasm-e-dost-dārī kā

koī dam-sāz hotā hai to ham meñ dam nahīñ hotā

fanā ke ba.ad miltā hai sukūn-e-rāhat-e-manzil

jahāñ shīrāza-e-hastī kabhī barham nahīñ hotā

koī miltā hai jab rāh-e-talab meñ rahbar-e-kāmil

to ham ko dūrī-e-manzil kā bhī kuchh ġham nahīñ hotā

hamāre ek dam par ek dam jo kuchh guzartī hai

mohabbat meñ kabhī aisā to ai hamdam nahīñ hotā

tumhīñ imdād ko 'ḳhushtar' kī aa jaate ho mushkil meñ

sahārā jab koī ai sarvar-e-ālam nahīñ hotā

masarrat ka hamesha ek hi aalam nahin hota

karam hota to hai un ka magar paiham nahin hota

KHushi ka gham jinhen hota hai samjho gham-nasib un ko

jinhen gham ki KHushi hoti hai un ko gham nahin hota

na le jata jo majnun aalam-e-diwangi hum se

to us ka zikr-e-KHair afsana-e-alam nahin hota

kahan hai tu burai se burai miT nahin sakti

are ghafil andhere se andhera kam nahin hota

yahi wo waqt hai jab aadmi ko hosh aata hai

KHuda ki yaad se ghafil Dil-e-pur-gham nahin hota

bura jab waqt aata hai to is duniya-e-ulfat mein

koi monis nahin hota koi hamdam nahin hota

tasalli se kabhi taskin-e-KHatir ho nahin sakti

junun-e-shauq baDh jata hai is se kam nahin hota

faza-e-bagh-e-hasti mein KHizan bhi hai bahaaren bhi

kahan KHushiyan nahin hotin kahan matam nahin hota

nibah aasan nahin duniya ki rasm-e-dost-dari ka

koi dam-saz hota hai to hum mein dam nahin hota

fana ke baad milta hai sukun-e-rahat-e-manzil

jahan shiraaza-e-hasti kabhi barham nahin hota

koi milta hai jab rah-e-talab mein rahbar-e-kaamil

to hum ko duri-e-manzil ka bhi kuchh gham nahin hota

hamare ek dam par ek dam jo kuchh guzarti hai

mohabbat mein kabhi aisa to ai hamdam nahin hota

tumhin imdad ko 'KHushtar' ki aa jate ho mushkil mein

sahaara jab koi ai sarwar-e-alam nahin hota