mashhur chaman mein teri gul pairahani hai

mash.hūr chaman meñ tirī gul pairahanī hai

qurbāñ tire har uzv pe nāzuk-badanī hai

uryānī-e-āshufta kahāñ jaa.e pas-az-marg

kushta hai tirā aur yahī be-kafnī hai

samjhe hai na parvāna na thāme hai zabāñ sham.a

vo soḳhtanī hai to ye gardan-zadanī hai

letā hī nikaltā hai mirā laḳht-e-jigar ashk

aañsū nahīñ goyā ki ye hiire kī kanī hai

bulbul kī kaf-e-ḳhāk bhī ab hogī pareshāñ

jaame kā tire rañg sitamgar chimanī hai

kuchh to ubhar ai sūrat-e-shīrīñ ki dikhā.ūñ

farhād ke zimme bhī ajab koh-kanī hai

hoñ garm-e-safar shām-e-ġharībāñ se ḳhushī hoñ

ai sub.h-e-vatan tū to mujhe be-vatanī hai

har-chand gadā huuñ maiñ tire ishq meñ lekin

in bul-havasoñ meñ koī mujh sā bhī ġhanī hai

har ashk mirā hai dur-e-shahvār se behtar

har laḳht-e-jigar rashk-e-aqīq-e-yamanī hai

bigḌī hai nipaT 'mīr' tapish aur jigar meñ

shāyad ki mire jī hī par ab aan banī hai

mashhur chaman mein teri gul pairahani hai

qurban tere har uzw pe nazuk-badani hai

uryani-e-ashufta kahan jae pas-az-marg

kushta hai tera aur yahi be-kafni hai

samjhe hai na parwana na thame hai zaban shama

wo soKHtani hai to ye gardan-zadani hai

leta hi nikalta hai mera laKHt-e-jigar ashk

aansu nahin goya ki ye hire ki kani hai

bulbul ki kaf-e-KHak bhi ab hogi pareshan

jame ka tere rang sitamgar chimani hai

kuchh to ubhar ai surat-e-shirin ki dikhaun

farhad ke zimme bhi ajab koh-kani hai

hon garm-e-safar sham-e-ghariban se KHushi hon

ai subh-e-watan tu to mujhe be-watani hai

har-chand gada hun main tere ishq mein lekin

in bul-hawason mein koi mujh sa bhi ghani hai

har ashk mera hai dur-e-shahwar se behtar

har laKHt-e-jigar rashk-e-aqiq-e-yamani hai

bigDi hai nipaT 'mir' tapish aur jigar mein

shayad ki mere ji hi par ab aan bani hai