din Dhala raat phir aa gai so raho so raho

din Dhalā raat phir aa ga.ī so raho so raho

manziloñ chhā ga.ī ḳhāmushī so raho so raho

saarā din tapte sūraj kī garmī meñ jalte rahe

ThanDī ThanDī havā phir chalī so raho so raho

garm sunsān qariyoñ kī dhartī mahakne lagī

ḳhaak rashk-e-iram ban ga.ī so raho so raho

razm-gāh-e-jahāñ ban ga.ī jā-e-aman-o-amāñ

hai yahī vaqt kī rāgnī so raho so raho

kaise sunsān haiñ āsmāñ chup khaḌe haiñ makāñ

hai fazā ajnabī ajnabī so raho so raho

thak ga.e naaqa o sārbāñ tham ga.e kārvāñ

ghanTiyoñ kī sadā so ga.ī so raho so raho

chāñdnī aur dhueñ ke sivā duur tak kuchh nahīñ

so ga.ī shahr kī har galī so raho so raho

gardish-e-vaqt kī loriyāñ raat kī raat haiñ

phir kahāñ ye havā ye namī so raho so raho

saarī bastī ke log is madhur lai meñ kho.e ga.e

duur bajne lagī bāñsurī so raho so raho

duur shāḳhoñ ke jhurmuT meñ jugnū bhī gum ho ga.e

chāñd meñ so ga.ī chāñdnī so raho so raho

ghar ke dīvār-o-dar raah tak tak ke shal ho ga.e

ab na aa.egā shāyad koī so raho so raho

sust raftār taare bhī āñkheñ jhapakne lage

ġham ke maaro ghaḌī do ghaḌī so raho so raho

muñh-añdhere hī 'nāsir' kise DhūñDne chal diye

duur hai sub.h-e-raushan abhī so raho so raho

din Dhala raat phir aa gai so raho so raho

manzilon chha gai KHamushi so raho so raho

sara din tapte suraj ki garmi mein jalte rahe

ThanDi ThanDi hawa phir chali so raho so raho

garm sunsan qariyon ki dharti mahakne lagi

KHak rashk-e-iram ban gai so raho so raho

razm-gah-e-jahan ban gai ja-e-aman-o-aman

hai yahi waqt ki ragni so raho so raho

kaise sunsan hain aasman chup khaDe hain makan

hai faza ajnabi ajnabi so raho so raho

thak gae naqa o sarban tham gae karwan

ghanTiyon ki sada so gai so raho so raho

chandni aur dhuen ke siwa dur tak kuchh nahin

so gai shahr ki har gali so raho so raho

gardish-e-waqt ki loriyan raat ki raat hain

phir kahan ye hawa ye nami so raho so raho

sari basti ke log is madhur lai mein khoe gae

dur bajne lagi bansuri so raho so raho

dur shaKHon ke jhurmuT mein jugnu bhi gum ho gae

chand mein so gai chandni so raho so raho

ghar ke diwar-o-dar rah tak tak ke shal ho gae

ab na aaega shayad koi so raho so raho

sust raftar tare bhi aankhen jhapakne lage

gham ke maro ghaDi do ghaDi so raho so raho

munh-andhere hi 'nasir' kise DhunDne chal diye

dur hai subh-e-raushan abhi so raho so raho