masiha apni koshish kar chuke hain

masīhā apnī koshish kar chuke haiñ

magar jis ko davā se mas.ale haiñ

tumhārā jhuuT duniyā ghuum aayā

mire sach ke abhī tasme khule haiñ

maiñ bas is dukh meñ aadhī rah ga.ī huuñ

jo achchhe din the puure ho chuke haiñ

tire kāñdhe se lag kar kaun royā

ye kis ke baal us par rah ga.e haiñ

sahī logoñ ko chunñe kā sila hai

ġhalat number se massage aa rahe haiñ

ye sun kar niiñd hī uḌ ga.ī hamārī

hamāre ḳhvāb dekhe jā rahe haiñ

bichhaḌ jaate to kis ko muñh dikhāte

so phir se muñh uThā kar aa ga.e haiñ

zabāneñ chal rahīñ thiiñ jaise aare

qadam donoñ ke uTh uTh kar ruke haiñ

masiha apni koshish kar chuke hain

magar jis ko dawa se masale hain

tumhaara jhuT duniya ghum aaya

mere sach ke abhi tasme khule hain

main bas is dukh mein aadhi rah gai hun

jo achchhe din the pure ho chuke hain

tere kandhe se lag kar kaun roya

ye kis ke baal us par rah gae hain

sahi logon ko chunne ka sila hai

ghalat number se massage aa rahe hain

ye sun kar nind hi uD gai hamari

hamare KHwab dekhe ja rahe hain

bichhaD jate to kis ko munh dikhate

so phir se munh uTha kar aa gae hain

zabanen chal rahin thin jaise aare

qadam donon ke uTh uTh kar ruke hain