maslahat-kosh na the KHwab jalane se rahe

maslahat-kosh na the ḳhvāb jalāne se rahe

raat bantī hui ik baat banāne se rahe

bazm-e-ā.inda meñ kab kaun kahāñ baiThegā

raftagāñ sab ko ye asrār batāne se rahe

tum ne lauT aane kī ummīd lagā.ī hai abas

ham jo dīvār uThā deñ vo girāne se rahe

tire pahlū se sarakte hue dil rone lagā

Dūbne vaale ko tairāk bachāne se rahe

ham se hotī nahīñ tash.hīr-e-ta.alluq be-kār

qīmtī shai sar-e-dīvār sajāne se rahe

apnī dilchaspī kā sāmān nahīñ thī duniyā

ham yahāñ Thahre magar tere bahāne se rahe

maslahat-kosh na the KHwab jalane se rahe

raat banti hui ek baat banane se rahe

bazm-e-ainda mein kab kaun kahan baiThega

raftagan sab ko ye asrar batane se rahe

tum ne lauT aane ki ummid lagai hai abas

hum jo diwar uTha den wo girane se rahe

tere pahlu se sarakte hue dil rone laga

Dubne wale ko tairak bachane se rahe

hum se hoti nahin tashhir-e-talluq be-kar

qimti shai sar-e-diwar sajaane se rahe

apni dilchaspi ka saman nahin thi duniya

hum yahan Thahre magar tere bahane se rahe