masnad-e-gham pe jach raha hun main

masnad-e-ġham pe jach rahā huuñ maiñ

apnā siina khurach rahā huuñ maiñ

ai sagān-e-gurasna-e-ayyām

juuñ ġhizā tum ko pach rahā huuñ maiñ

andarūn-e-hisār-e-ḳhāmoshī

shor kī tarah mach rahā huuñ maiñ

vaqt kā ḳhūn-e-rā.egāñ huuñ magar

ḳhushk lamhoñ meñ rach rahā huuñ maiñ

ḳhuun meñ tar-ba-tar rahā mirā naam

har zamāne kā sach rahā huuñ maiñ

haal ye hai ki apnī hālat par

ġhaur karne se bach rahā huuñ maiñ

masnad-e-gham pe jach raha hun main

apna sina khurach raha hun main

ai sagan-e-gurasna-e-ayyam

jun ghiza tum ko pach raha hun main

andarun-e-hisar-e-KHamoshi

shor ki tarah mach raha hun main

waqt ka KHun-e-raegan hun magar

KHushk lamhon mein rach raha hun main

KHun mein tar-ba-tar raha mera nam

har zamane ka sach raha hun main

haal ye hai ki apni haalat par

ghaur karne se bach raha hun main