masrur ho rahe hain gham-e-ashiqi se hum

masrūr ho rahe haiñ ġham-e-'āshiqī se ham

kyuuñ tang hoñge kashmakash-e-zindagī se ham

koh-e-alam uThā hī liyā rāh-e-'ishq meñ

apnī ḳhushī ko chhoḌ ke terī ḳhushī se ham

lab-hā-e-yār ne to gulistāñ piro liye

ḳhushbū jo pā rahe haiñ tirī pankhuḌī se ham

apnī bahār dekh ke hairān rah ga.e

vāqif hue haiñ jab se rumūz-e-ḳhudī se ham

merī jabīn-e-shauq ko dar un kā mil gayā

uTh kar kahāñ ko jaa.eñ dar-e-bandagī se ham

rāh-e-vafā meñ jī ke mare mar ke bhī jiye

khelā usī tarah se kiye zindagī se ham

dāman ko tār-tār kiyā manzileñ milīñ

ā.eñge ab na hosh meñ dīvāngī se ham

ḳhud dard ban gayā mirā darmān-e-zindagī

itnā qarīb ho ga.e kuchh dard hī se ham

jo maqsad-e-hayāt ko bhūle vahī kaheñ

tang aa chuke haiñ kashmakash-e-zindagī se ham

'vāsil' ke dāġh-e-dil se hai manzil kī raushnī

varna nikal ke aate bhalā tīrgī se ham

masrur ho rahe hain gham-e-'ashiqi se hum

kyun tang honge kashmakash-e-zindagi se hum

koh-e-alam uTha hi liya rah-e-'ishq mein

apni KHushi ko chhoD ke teri KHushi se hum

lab-ha-e-yar ne to gulistan piro liye

KHushbu jo pa rahe hain teri pankhuDi se hum

apni bahaar dekh ke hairan rah gae

waqif hue hain jab se rumuz-e-KHudi se hum

meri jabin-e-shauq ko dar un ka mil gaya

uTh kar kahan ko jaen dar-e-bandagi se hum

rah-e-wafa mein ji ke mare mar ke bhi jiye

khela usi tarah se kiye zindagi se hum

daman ko tar-tar kiya manzilen milin

aaenge ab na hosh mein diwangi se hum

KHud dard ban gaya mera darman-e-zindagi

itna qarib ho gae kuchh dard hi se hum

jo maqsad-e-hayat ko bhule wahi kahen

tang aa chuke hain kashmakash-e-zindagi se hum

'wasil' ke dagh-e-dil se hai manzil ki raushni

warna nikal ke aate bhala tirgi se hum