mastana KHushbuon se nahae hue badan

mastāna ḳhushbuoñ se nahā.e hue badan

sar par ġhalāzatoñ ko uThā.e hue badan

bosīda chīthaḌoñ meñ sar-e-rāh dekhiye

zaḳhmoñ ko muflisī ke chhupā.e hue badan

shāhī haram-sarāoñ meñ phūloñ kī sej par

hīroñ se motiyoñ se sajā.e hue badan

koThoñ pe zard chehroñ meñ pazhmurda-o-udās

ahl-e-havas ke hāthoñ biThā.e hue badan

masrūf-e-zikr-o-fikr ba-sad ijz-o-inkisār

rab ke huzūr sar ko jhukā.e hue badan

mastana KHushbuon se nahae hue badan

sar par ghalazaton ko uThae hue badan

bosida chithaDon mein sar-e-rah dekhiye

zaKHmon ko muflisi ke chhupae hue badan

shahi haram-saraon mein phulon ki sej par

hiron se motiyon se sajae hue badan

koThon pe zard chehron mein pazhmurda-o-udas

ahl-e-hawas ke hathon biThae hue badan

masruf-e-zikr-o-fikr ba-sad ijz-o-inkisar

rab ke huzur sar ko jhukae hue badan