mat bura usko kaho garche wo achchha bhi nahin

mat burā us ko kaho garche vo achchhā bhī nahīñ

vo na hotā to ġhazal maiñ kabhī kahtā bhī nahīñ

jāntā thā ki sitamgar hai magar kyā kiije

dil lagāne ke liye aur koī thā bhī nahīñ

jaisā be-dard ho vo phir bhī ye jaisā mahbūb

aisā koī na huā aur koī hogā bhī nahīñ

vahī hogā jo huā hai jo huā kartā hai

maiñ ne is pyaar kā anjām to sochā bhī nahīñ

haa.e kyā dil hai ki lene ke liye jaatā hai

us se paimān-e-vafā jis pe bharosā bhī nahīñ

bārhā guftugū hotī rahī lekin mirā naam

us ne pūchhā bhī nahīñ maiñ ne batāyā bhī nahīñ

tohfa zaḳhmoñ kā mujhe bhej diyā kartā hai

mujh se nārāz hai lekin mujhe bhūlā bhī nahīñ

dostī us se nibah jaa.e bahut mushkil hai

merā to va.ada hai us kā to irāda bhī nahīñ

mere ash.ār vo sun sun ke maze letā rahā

maiñ usī se huuñ muḳhātib vo ye samjhā bhī nahīñ

mere vo dost mujhe dād-e-suḳhan kyā deñge

jin ke dil kā koī hissa zarā TuuTā bhī nahīñ

mujh ko banñā paḌā shā.ir ki maiñ adnā ġham-e-dil

zabt bhī kar na sakā phuuT ke royā bhī nahīñ

shā.irī jaisī ho 'ājiz' kī bhalī ho ki burī

aadmī achchhā hai lekin bahut achchhā bhī nahīñ

mat bura us ko kaho garche wo achchha bhi nahin

wo na hota to ghazal main kabhi kahta bhi nahin

jaanta tha ki sitamgar hai magar kya kije

dil lagane ke liye aur koi tha bhi nahin

jaisa be-dard ho wo phir bhi ye jaisa mahbub

aisa koi na hua aur koi hoga bhi nahin

wahi hoga jo hua hai jo hua karta hai

main ne is pyar ka anjam to socha bhi nahin

hae kya dil hai ki lene ke liye jata hai

us se paiman-e-wafa jis pe bharosa bhi nahin

barha guftugu hoti rahi lekin mera nam

us ne puchha bhi nahin main ne bataya bhi nahin

tohfa zaKHmon ka mujhe bhej diya karta hai

mujh se naraaz hai lekin mujhe bhula bhi nahin

dosti us se nibah jae bahut mushkil hai

mera to wada hai us ka to irada bhi nahin

mere ashaar wo sun sun ke maze leta raha

main usi se hun muKHatib wo ye samjha bhi nahin

mere wo dost mujhe dad-e-suKHan kya denge

jin ke dil ka koi hissa zara TuTa bhi nahin

mujh ko banna paDa shair ki main adna gham-e-dil

zabt bhi kar na saka phuT ke roya bhi nahin

shairi jaisi ho 'ajiz' ki bhali ho ki buri

aadmi achchha hai lekin bahut achchha bhi nahin