mat Takrana patthar ban kar aahan hum ho jaenge

mat Takrānā patthar ban kar aahan ham ho jā.eñge

pyaar se aa kar tum jo miloge gulshan ham ho jā.eñge

raaz chhupānā chāho to ham parde kā bhī kaam kareñ

aur haqīqat chāho to phir darpan ham ho jā.eñge

ham ko dushman mat samjho ham pyaar sikhāte haiñ sab ko

jis meñ bhare hoñ phuul vafā ke dāman ham ho jā.eñge

ḳhushiyoñ meñ rañgīn bahāroñ kā tum ko paiġhām bhī deñ

dukh ke mausam meñ āñkhoñ kā sāvan ham ho jā.eñge

Thukrāyā to kāñTe ban kar rāhoñ meñ bujh sakte haiñ

apnāyā to aap ke ghar kā āñgan ham ho jā.eñge

pyaar kā jaadū sab ke sar par chaḌh kar phir to bolegā

tum banñā kānhā kī murlī madhūban ham ho jā.eñge

apnā dukh-sukh lamha lamha mil-jul kar bāñTeñge 'rāg'

tum ban jaanā aañkh ke aañsū dāman ham ho jā.eñge

mat Takrana patthar ban kar aahan hum ho jaenge

pyar se aa kar tum jo miloge gulshan hum ho jaenge

raaz chhupana chaho to hum parde ka bhi kaam karen

aur haqiqat chaho to phir darpan hum ho jaenge

hum ko dushman mat samjho hum pyar sikhate hain sab ko

jis mein bhare hon phul wafa ke daman hum ho jaenge

KHushiyon mein rangin bahaaron ka tum ko paigham bhi den

dukh ke mausam mein aankhon ka sawan hum ho jaenge

Thukraya to kanTe ban kar rahon mein bujh sakte hain

apnaya to aap ke ghar ka aangan hum ho jaenge

pyar ka jadu sab ke sar par chaDh kar phir to bolega

tum banna kanha ki murli madhuban hum ho jaenge

apna dukh-sukh lamha lamha mil-jul kar banTenge 'rag'

tum ban jaana aankh ke aansu daman hum ho jaenge