mata-e-umr-e-guzishta sameT kar le ja

matā-e-umr-e-guzishtā sameT kar le jā

jo ho sake to mirā dard apne ghar le jā

tū jā rahā hai to merī sisaktī āñkhoñ se

sulagtī shaam pighaltī huī sahar le jā

uchaTtī āñkhoñ se tahzīb kā safar kaisā

tū apne-āp ko tārīḳh ke udhar le jā

huzūr-e-dost ik ā.īna jagmagātā hai

tū apnī zaat kā paikar tarāsh le kar le jā

sulag rahī hai tirī yaad merī rag rag meñ

ab apnī yaad mire dil se chhīn kar le jā

'asar' ke paas to kuchh bhī nahīñ hunar ke sivā

tū be-hunar hai to sarmāya-e-hunar le jā

mata-e-umr-e-guzishta sameT kar le ja

jo ho sake to mera dard apne ghar le ja

tu ja raha hai to meri sisakti aankhon se

sulagti sham pighalti hui sahar le ja

uchaTti aankhon se tahzib ka safar kaisa

tu apne-ap ko tariKH ke udhar le ja

huzur-e-dost ek aaina jagmagata hai

tu apni zat ka paikar tarash le kar le ja

sulag rahi hai teri yaad meri rag rag mein

ab apni yaad mere dil se chhin kar le ja

'asar' ke pas to kuchh bhi nahin hunar ke siwa

tu be-hunar hai to sarmaya-e-hunar le ja