matlab ki baat shakl se pahchan jaiye

matlab kī baat shakl se pahchān jā.iye

maiñ kyuuñ kahūñ zabān se ḳhud jaan jā.iye

aa.e vo naza.a meñ bhī na hasrat nikālne

ab zer-e-ḳhāk le ke sab armān jā.iye

us bholī bholī shakl ke ho jā.iye nisār

un bholī bholī bātoñ ke qurbān jā.iye

bāñheñ gale meñ Dāliye bhī ab hañsī-ḳhushī

ye hai shab-e-visāl kahā maan jā.iye

kyā thā jo muskurāte hue kah ga.e abhī

ḳhaak aa ke mere dar kī zarā chhān jā.iye

mehmāñ-navāz un sā koī dūsrā nahīñ

jī meñ hai un ke ghar kabhī mehmān jā.iye

hai qasd aaj hazrat-e-dil un kī bazm kā

allāh aap kā hai nigahbān jā.iye

jā baiThiye tunuk ke zarā mujh se phir alag

be-kuchh kahe sune bhī burā maan jā.iye

bad-yumn mere haq meñ hai sub.h-e-shab-e-visāl

khole hue na baal pareshān jā.iye

kyā taab hai 'riyāz' tumhārī zabān kī

rañgīnī-e-kalām ke qurbān jā.iye

matlab ki baat shakl se pahchan jaiye

main kyun kahun zaban se KHud jaan jaiye

aae wo naza mein bhi na hasrat nikalne

ab zer-e-KHak le ke sab arman jaiye

us bholi bholi shakl ke ho jaiye nisar

un bholi bholi baaton ke qurban jaiye

banhen gale mein Daliye bhi ab hansi-KHushi

ye hai shab-e-visal kaha man jaiye

kya tha jo muskuraate hue kah gae abhi

KHak aa ke mere dar ki zara chhan jaiye

mehman-nawaz un sa koi dusra nahin

ji mein hai un ke ghar kabhi mehman jaiye

hai qasd aaj hazrat-e-dil un ki bazm ka

allah aap ka hai nigahban jaiye

ja baiThiye tunuk ke zara mujh se phir alag

be-kuchh kahe sune bhi bura man jaiye

bad-yumn mere haq mein hai subh-e-shab-e-visal

khole hue na baal pareshan jaiye

kya tab hai 'riyaz' tumhaari zaban ki

rangini-e-kalam ke qurban jaiye