mauj-e-hawa to ab ke ajab kaam kar gai

mauj-e-havā to ab ke ajab kaam kar ga.ī

uḌte hue parindoñ ke par bhī katar ga.ī

āñkheñ kahīñ dimāġh kahīñ dast o pā kahīñ

rastoñ kī bhīḌ-bhāḌ meñ duniyā bikhar ga.ī

kuchh log dhuup piite haiñ sāhil pe leT kar

tūfān tak agar kabhī is kī ḳhabar ga.ī

nikle kabhī na ghar se magar is ke bāvajūd

apnī tamām umr safar meñ guzar ga.ī

dekhā unheñ to dekhne se jī nahīñ bharā

aur aañkh hai ki kitne hī ḳhvāboñ se bhar ga.ī

jaane havā ne kaan meñ chupke se kyā kahā

kuchh to hai kyuuñ pahāḌ se naddī utar ga.ī

sūraj samajh sakā na ise umr bhar 'nizām'

tahrīr ret par to havā chhoḌ kar ga.ī

mauj-e-hawa to ab ke ajab kaam kar gai

uDte hue parindon ke par bhi katar gai

aankhen kahin dimagh kahin dast o pa kahin

raston ki bhiD-bhaD mein duniya bikhar gai

kuchh log dhup pite hain sahil pe leT kar

tufan tak agar kabhi is ki KHabar gai

nikle kabhi na ghar se magar is ke bawajud

apni tamam umr safar mein guzar gai

dekha unhen to dekhne se ji nahin bhara

aur aankh hai ki kitne hi KHwabon se bhar gai

jaane hawa ne kan mein chupke se kya kaha

kuchh to hai kyun pahaD se naddi utar gai

suraj samajh saka na ise umr bhar 'nizam'

tahrir ret par to hawa chhoD kar gai