mauj-e-KHayal-e-yar gham-e-asar aai hai

mauj-e-ḳhayāl-e-yār ġham-e-āsār aa.ī hai

kyuuñ chāhatoñ ke biich ye dīvār aa.ī hai

ik buuñd haath aa.ī hai patthar nichoḌ kar

āñkhoñ se lab pe quvvat-e-iz.hār aa.ī hai

ham dushmanoñ meñ apnī zabāñ haar aa.e haiñ

jab haath kaT chuke haiñ to talvār aa.ī hai

kyuuñ āsmāñ ne dast-e-tahī phir kiyā darāz

kyuuñ dhuup zer-e-sāya-e-dīvār aa.ī hai

sūraj jhulas gayā hai har ik shāḳh-e-jism-o-jāñ

din Dhal gayā to ghar meñ shab-e-tār aa.ī hai

be-saut thā 'mujībī' har ik naġhma-e-ḳhayāl

TuuTā jo dil to saaz kī jhankār aa.ī hai

mauj-e-KHayal-e-yar gham-e-asar aai hai

kyun chahaton ke bich ye diwar aai hai

ek bund hath aai hai patthar nichoD kar

aankhon se lab pe quwwat-e-izhaar aai hai

hum dushmanon mein apni zaban haar aae hain

jab hath kaT chuke hain to talwar aai hai

kyun aasman ne dast-e-tahi phir kiya daraaz

kyun dhup zer-e-saya-e-diwar aai hai

suraj jhulas gaya hai har ek shaKH-e-jism-o-jaan

din Dhal gaya to ghar mein shab-e-tar aai hai

be-saut tha 'mujibi' har ek naghma-e-KHayal

TuTa jo dil to saz ki jhankar aai hai