mauj-e-nikhat ki saba dekh sawari tayyar

mauj-e-nik.hat kī sabā dekh savārī tayyār

ḳhaar se kī hai gul-e-tar ne kaTārī tayyār

kah do majnūñ se kare apnī savārī tayyār

aaj yaañ hotī hai lailā kī savārī tayyār

haath donoñ kaf-e-afsos kī sūrat likkhe

kī jo naqqāsh ne tasvīr hamārī tayyār

teġh ko saan pe rakkhā thā tabhī qātil ne

gardan apnī na huī thī abhī saarī tayyār

lab-e-jāñ-baḳhsh kī tere jo safā ko dekhe

āb-e-haivāñ ho pa.e-ā.īna-dārī tayyār

kis misī zeb kā gulshan se sunā hai jaanā

barg-e-sausan ne jo phir kī hai kaTārī tayyār

ham subuk-rūh asīroñ ke liye lāzim hai

qafas-e-gul ko kare bād-e-bahārī tayyār

haar kyuuñ us ke gale kā maiñ na huuñ zar-gar ne

kī hai zanjīr gale kī tire bhārī tayyār

ai ajal ziist kā kyā un se tū māñge hai hisāb

jo haiñ har dam pa.e-anfās-shumārī tayyār

surḳh nefe se pa.e-said-e-dil-e-bul-havasāñ

kamar us kī huī juuñ yuuz shikārī tayyār

juuñ juuñ baḌhte haiñ mire dast-e-junūñ ke nāḳhun

vuuñ vuuñ hote haiñ pa.e-sīna-figārī tayyār

putliyāñ jaa.e sitāroñ kī Tikī haiñ is meñ

dīda-rezī se huī kafash tumhārī tayyār

ho ḳhajil kyūñki na nemāñ ki gulābī laala

mai se kartī hai tirī chashm-e-ḳhumārī tayyār

az-barā.e-kamar-e-nāzuk-e-rashk-e-rag-e-gul

bāġhbāñ kiijo tū phūloñ kī kaTārī tayyār

likh ba-tabdīl-e-qavāfī ġhazal ik 'mus.hafī' aur

nāfa-e-nuqta se kar mushk-e-tatārī tayyār

mauj-e-nikhat ki saba dekh sawari tayyar

KHar se ki hai gul-e-tar ne kaTari tayyar

kah do majnun se kare apni sawari tayyar

aaj yan hoti hai laila ki sawari tayyar

hath donon kaf-e-afsos ki surat likkhe

ki jo naqqash ne taswir hamari tayyar

tegh ko san pe rakkha tha tabhi qatil ne

gardan apni na hui thi abhi sari tayyar

lab-e-jaan-baKHsh ki tere jo safa ko dekhe

aab-e-haiwan ho pae-aina-dari tayyar

kis misi zeb ka gulshan se suna hai jaana

barg-e-sausan ne jo phir ki hai kaTari tayyar

hum subuk-ruh asiron ke liye lazim hai

qafas-e-gul ko kare baad-e-bahaari tayyar

haar kyun us ke gale ka main na hun zar-gar ne

ki hai zanjir gale ki tere bhaari tayyar

ai ajal zist ka kya un se tu mange hai hisab

jo hain har dam pae-anfas-shumari tayyar

surKH nefe se pae-said-e-dil-e-bul-hawasan

kamar us ki hui jun yuz shikari tayyar

jun jun baDhte hain mere dast-e-junun ke naKHun

wun wun hote hain pae-sina-figari tayyar

putliyan jae sitaron ki Tiki hain is mein

dida-rezi se hui kafash tumhaari tayyar

ho KHajil kyunki na neman ki gulabi lala

mai se karti hai teri chashm-e-KHumari tayyar

az-barae-kamar-e-nazuk-e-rashk-e-rag-e-gul

baghban kijo tu phulon ki kaTari tayyar

likh ba-tabdil-e-qawafi ghazal ek 'mushafi' aur

nafa-e-nuqta se kar mushk-e-tatari tayyar