mauj-e-reg sarab-e-sahra kaise banti hai

mauj-e-reg sarāb-e-sahrā kaise bantī hai

bahtā huā ā.īna-e-dariyā kaise bantī hai

khil ke kalī chup kyuuñ rahtī hai shāḳh-e-zar-afshāñ par

phir ye chahaktī koktī chiḌiyā kaise bantī hai

bāhar ke manzar bhī hasīñ kyuuñ lagne lagte haiñ

dil kī lahr ik kaif-e-sarāpā kaise bantī hai

aañsū se kitnā gahrā hai miTTī kā rishta

duniyā phir ġham se begāna kaise bantī hai

uḌte hue pattoñ kī sadā ye shor havāoñ kā

jangal kī ye fazā sannāTā kaise bantī hai

maiñ to chaak pe kūza-gar ke haath kī miTTī huuñ

ab ye miTTī dekh khilaunā kaise bantī hai

bah gayā merā gharauñdā to ik rele hī meñ 'zeb'

paanī par qaa.em ye duniyā kaise bantī hai

mauj-e-reg sarab-e-sahra kaise banti hai

bahta hua aaina-e-dariya kaise banti hai

khil ke kali chup kyun rahti hai shaKH-e-zar-afshan par

phir ye chahakti kokti chiDiya kaise banti hai

bahar ke manzar bhi hasin kyun lagne lagte hain

dil ki lahr ek kaif-e-sarapa kaise banti hai

aansu se kitna gahra hai miTTi ka rishta

duniya phir gham se begana kaise banti hai

uDte hue patton ki sada ye shor hawaon ka

jangal ki ye faza sannaTa kaise banti hai

main to chaak pe kuza-gar ke hath ki miTTi hun

ab ye miTTi dekh khilauna kaise banti hai

bah gaya mera gharaunda to ek rele hi mein 'zeb'

pani par qaem ye duniya kaise banti hai