maujon mein talatum hai sahil pe bhi tufan hai

maujoñ meñ talātum hai sāhil pe bhī tūfāñ hai

ab apne safīne kā allāh nigahbāñ hai

har chand muhīt-e-dil tārīkī-e-hijrāñ hai

sho.ala tirī yādoñ kā siine meñ farozāñ hai

dekhā hī nahīñ tum ne kyā rang-e-bahārāñ hai

surḳhī hai jo phūloñ par vo ḳhūn-e-shahīdāñ hai

taḳhrīb ke parde meñ ta.amīr bhī pinhāñ hai

tārīk fazāoñ meñ ik sham.a farozāñ hai

kyā ġham jo añdherā hai duniyā kī fazāoñ meñ

jo dāġh-e-tamannā hai ḳhurshīd-e-daraḳhshāñ hai

khulte nahīñ lab mere ehsās-e-hamiyyat se

martā huuñ ki hāl-e-dil chehre se numāyāñ hai

ḳhvāboñ ke darīchoñ se jhāñkā hai bahāroñ ne

ab dāman-e-sahrā bhī dāmān-e-gulistāñ hai

mumkin hai sabā ḳhushbū sahrā meñ uḌā laa.e

har-chand ghaTāoñ kā ruḳh sū-e-gulistāñ hai

kyā ḳhauf tujhe āḳhir ai rāh-rav-e-hastī

kahte haiñ ajal jis ko hastī kī nigahbāñ hai

chhā.egī ḳhushī ik din ġham-ḳhāna-e-hastī par

ġham to mirī duniyā meñ kuchh der kā mehmāñ hai

ab aap kī marzī hai jo chāheñ hameñ samjheñ

dil aap kā shaidā hai dil aap pe nāzāñ hai

tasvīr tirī ab tak phirtī hai nigāhoñ meñ

har yaad tirī ab tak nazdīk-e-rag-e-jāñ hai

uTh kar tire kūche se ab jaa.e kahāñ 'azmat'

duniyā bhī bayābāñ hai uqbā bhī bayābāñ hai

maujon mein talatum hai sahil pe bhi tufan hai

ab apne safine ka allah nigahban hai

har chand muhit-e-dil tariki-e-hijran hai

shoala teri yaadon ka sine mein farozan hai

dekha hi nahin tum ne kya rang-e-bahaaran hai

surKHi hai jo phulon par wo KHun-e-shahidan hai

taKHrib ke parde mein tamir bhi pinhan hai

tarik fazaon mein ek shama farozan hai

kya gham jo andhera hai duniya ki fazaon mein

jo dagh-e-tamanna hai KHurshid-e-daraKHshan hai

khulte nahin lab mere ehsas-e-hamiyyat se

marta hun ki haal-e-dil chehre se numayan hai

KHwabon ke darichon se jhanka hai bahaaron ne

ab daman-e-sahra bhi daman-e-gulistan hai

mumkin hai saba KHushbu sahra mein uDa lae

har-chand ghaTaon ka ruKH su-e-gulistan hai

kya KHauf tujhe aaKHir ai rah-raw-e-hasti

kahte hain ajal jis ko hasti ki nigahban hai

chhaegi KHushi ek din gham-KHana-e-hasti par

gham to meri duniya mein kuchh der ka mehman hai

ab aap ki marzi hai jo chahen hamein samjhen

dil aap ka shaida hai dil aap pe nazan hai

taswir teri ab tak phirti hai nigahon mein

har yaad teri ab tak nazdik-e-rag-e-jaan hai

uTh kar tere kuche se ab jae kahan 'azmat'

duniya bhi bayaban hai uqba bhi bayaban hai