maula kisi ko aisa muqaddar na dijiyo

maulā kisī ko aisā muqaddar na dījiyo

dilbar nahīñ to phir koī dīgar na dījiyo

apne savāl sahl na lagne lageñ use

aate bhī hoñ javāb to far-far na dījiyo

chādar vo dījiyo use jis par shikan na aa.e

jis par shikan na aa.e vo bistar na dījiyo

aa.e na kār-e-shukr-guzārī pe koī harf

jab dījiyo to zarf se baḌh kar na dījiyo

bikhrāo kuchh nahīñ bhī simaTte mire aziiz

apne kisī ḳhayāl ko paikar na dījiyo

tafrīq rahne dījiyo tārīf-o-tanz meñ

ab ke sharāb zahr milā kar na dījiyo

yā dil se tark kījiyo dastār kā ḳhayāl

yā us muāmle meñ kabhī sar na dījiyo

kahiyo ki tū ne ḳhuub banā.ī hai kā.enāt

lekin use likhā.ī ke number na dījiyo

me.aar se sivā yahāñ raftār chāhiye

'javvād' us ko āḳhirī over na dījiyo

maula kisi ko aisa muqaddar na dijiyo

dilbar nahin to phir koi digar na dijiyo

apne sawal sahl na lagne lagen use

aate bhi hon jawab to far-far na dijiyo

chadar wo dijiyo use jis par shikan na aae

jis par shikan na aae wo bistar na dijiyo

aae na kar-e-shukr-guzari pe koi harf

jab dijiyo to zarf se baDh kar na dijiyo

bikhrao kuchh nahin bhi simaTte mere aziz

apne kisi KHayal ko paikar na dijiyo

tafriq rahne dijiyo tarif-o-tanz mein

ab ke sharab zahr mila kar na dijiyo

ya dil se tark kijiyo dastar ka KHayal

ya us muamle mein kabhi sar na dijiyo

kahiyo ki tu ne KHub banai hai kaenat

lekin use likhai ke number na dijiyo

mear se siwa yahan raftar chahiye

'jawwad' us ko aaKHiri ower na dijiyo