mausam-e-gul aaya hai yaro kuchh meri tadbir karo

mausam-e-gul aayā hai yaaro kuchh merī tadbīr karo

yaanī sāya-e-sarv-o-gul meñ ab mujh ko zanjīr karo

pesh-e-sa.āyat kyā jaa.e hai haq hai merī taraf so hai

maiñ to chup baiThā huuñ yaksū gar koī taqrīr karo

kaan lagā rahtā hai ġhair us shoḳh kamāñ abrū ke bahut

is to gunāh-e-azīm pe yaaro naak meñ us kī tiir karo

pher diye haiñ dil logoñ ke mālik ne kuchh merī taraf

tum bhī Tuk ai āh-o-nāla qalboñ meñ tāsīr karo

aage hī āzurda haiñ ham dil haiñ shikasta hamāre sab

harf-e-ranjish biich meñ lā kar aur na ab dil-gīr karo

sher kiye mauzūñ to aise jin se ḳhush haiñ sāhib-e-dil

roveñ kuḌheñ jo yaad kareñ ab aisā tum kuchh 'mīr' karo

mausam-e-gul aaya hai yaro kuchh meri tadbir karo

yani saya-e-sarw-o-gul mein ab mujh ko zanjir karo

pesh-e-saayat kya jae hai haq hai meri taraf so hai

main to chup baiTha hun yaksu gar koi taqrir karo

kan laga rahta hai ghair us shoKH kaman abru ke bahut

is to gunah-e-azim pe yaro nak mein us ki tir karo

pher diye hain dil logon ke malik ne kuchh meri taraf

tum bhi Tuk ai aah-o-nala qalbon mein tasir karo

aage hi aazurda hain hum dil hain shikasta hamare sab

harf-e-ranjish bich mein la kar aur na ab dil-gir karo

sher kiye mauzun to aise jin se KHush hain sahib-e-dil

rowen kuDhen jo yaad karen ab aisa tum kuchh 'mir' karo