mausam-e-gul hai tere surKH dahan ki had tak

mausam-e-gul hai tire surḳh dahan kī had tak

yā mire zaḳhmoñ se ārāsta tan kī had tak

vaqt har zaḳhm ko bhar detā hai kuchh bhī kiije

yaad rah jaatī hai halkī sī chubhan kī had tak

na kisī gul se ta.alluq na kisī ḳhaar se bair

rabt gulzār se hai bū-e-saman kī had tak

vo mujhe bhuul nahīñ paayā abhī tak ya.anī

maiñ use yaad huuñ māthe kī shikan kī had tak

baat ik aur pas-e-parda-e-alfāz bhī thī

us ne ḳhat merā paḌhā lutf-e-suḳhan kī had tak

mahr-o-mahtāb kī ḳhvāhish se mujhe kyā lenā

mutma.in dil hai jab ik sīm-badan kī had tak

ye jo kahnā hai ki har husn jafā-pesha hai

ek tohmat hai mire rashk-e-adn kī had tak

mausam-e-gul hai tere surKH dahan ki had tak

ya mere zaKHmon se aarasta tan ki had tak

waqt har zaKHm ko bhar deta hai kuchh bhi kije

yaad rah jati hai halki si chubhan ki had tak

na kisi gul se talluq na kisi KHar se bair

rabt gulzar se hai bu-e-saman ki had tak

wo mujhe bhul nahin paya abhi tak yani

main use yaad hun mathe ki shikan ki had tak

baat ek aur pas-e-parda-e-alfaz bhi thi

us ne KHat mera paDha lutf-e-suKHan ki had tak

mahr-o-mahtab ki KHwahish se mujhe kya lena

mutmain dil hai jab ek sim-badan ki had tak

ye jo kahna hai ki har husn jafa-pesha hai

ek tohmat hai mere rashk-e-adn ki had tak