mausam hara-bhara hai ye manzar bhi dekh le

mausam harā-bharā hai ye manzar bhī dekh le

kuchh der tāzgī meñ sañvar kar bhī dekh le

sach baat kahne ke liye apnī zabāñ to khol

phir kis taraf se aate haiñ patthar bhī dekh le

maanā ki tishnagī kisī sahrā kī den hai

faiyyaz kis qadar hai samundar bhī dekh le

tū ne balā kī dhuup meñ kaaTī tamām umr

ab sard shab kī oḌh ke chādar bhī dekh le

duniyā ko tū ne dekhā hai khiḌkī se jhāñk kar

ik roz apne ghar se nikal kar bhī dekh le

kāñToñ kā taaj sar pe liye kyoñ salīb par

hai āzmā.ishoñ meñ payambar bhī dekh le

nām-e-'sabā' hathelī pe apnī kabhī sajā

taaki zamāna us kā muqaddar bhī dekh le

mausam hara-bhara hai ye manzar bhi dekh le

kuchh der tazgi mein sanwar kar bhi dekh le

sach baat kahne ke liye apni zaban to khol

phir kis taraf se aate hain patthar bhi dekh le

mana ki tishnagi kisi sahra ki den hai

faiyyaz kis qadar hai samundar bhi dekh le

tu ne bala ki dhup mein kaTi tamam umr

ab sard shab ki oDh ke chadar bhi dekh le

duniya ko tu ne dekha hai khiDki se jhank kar

ek roz apne ghar se nikal kar bhi dekh le

kanTon ka taj sar pe liye kyon salib par

hai aazmaishon mein payambar bhi dekh le

nam-e-'saba' hatheli pe apni kabhi saja

taki zamana us ka muqaddar bhi dekh le