mausam KHushbu rang dhanak ke manzar sare uske the

mausam ḳhushbū rang dhanak ke manzar saare us ke the

raat kī kaalī chhāyā merī chāñd sitāre us ke the

biich samundar baḳht hamārā sāhil tak ye aatā kab

mauj-e-havā pe naam thā us kā duur kināre us ke the

sahmī sahmī gūñgī bahrī ek gujaryā merī thī

hañste gaate dhuul uḌāte rāj-dulāre us ke the

ik chhoTī sī chhat kī ḳhātir kyā kyā ḳhvāb gañvā baiThī

bhuul ga.ī ki īñTeñ us kī miTTī gaare us ke the

zanjīroñ ke badle ab bhī gahne paatī huuñ jaise

sadiyoñ se ye jabr ke bandhan biich hamāre us ke the

kitnī ajab taqsīm 'tabassum' kartī hai ye duniyā bhī

merā hissa zahr-e-halāhal amrit dhāre us ke the

mausam KHushbu rang dhanak ke manzar sare us ke the

raat ki kali chhaya meri chand sitare us ke the

bich samundar baKHt hamara sahil tak ye aata kab

mauj-e-hawa pe nam tha us ka dur kinare us ke the

sahmi sahmi gungi bahri ek gujarya meri thi

hanste gate dhul uDate raj-dulare us ke the

ek chhoTi si chhat ki KHatir kya kya KHwab ganwa baiThi

bhul gai ki inTen us ki miTTi gare us ke the

zanjiron ke badle ab bhi gahne pati hun jaise

sadiyon se ye jabr ke bandhan bich hamare us ke the

kitni ajab taqsim 'tabassum' karti hai ye duniya bhi

mera hissa zahr-e-halahal amrit dhaare us ke the