maut bhi aati nahin hijr ke bimaron ko

maut bhī aatī nahīñ hijr ke bīmāroñ ko

kyā musībat hai zarā dekhnā bechāroñ ko

nāla-e-dil ne hamāre to asar kam na kiyā

aur ma.azūrī ziyāda huī dil-dāroñ ko

go haiñ jannat meñ maze lek nahīñ bhūlne kā

hoñT kā chāTnā tujh lab ke namak-ḳhvāroñ ko

is se behtar nahīñ kui chiiz sivā bose ke

rū-numā.ī meñ jo deveñ tire ruḳhsāroñ ko

kabhī ronā kabhī sar dhunñā kabhī chup rahnā

kaam karne haiñ bahut se tire be-kāroñ ko

maiñ ne kāġhaz tirī tasvīr kā iisā ko diyā

nusḳha juuñ dete haiñ bīmār sab attāroñ ko

pattharoñ hī pe tajallī hai to ham ġhairat se

āñkhoñ hī meñ liye mar jā.eñge nazzāroñ ko

sab namūna hai haqīqat kā jahāñ tak hai majāz

naas jo karte haiñ gulzāroñ kī dīvāroñ ko

ye ġhazal ḳhidmat-e-navvāb kī hai mīr-'razā'

aur ik dūsrī kah dījiye ham-kāroñ ko

maut bhi aati nahin hijr ke bimaron ko

kya musibat hai zara dekhna bechaaron ko

nala-e-dil ne hamare to asar kam na kiya

aur mazuri ziyaada hui dil-daron ko

go hain jannat mein maze lek nahin bhulne ka

honT ka chaTna tujh lab ke namak-KHwaron ko

is se behtar nahin kui chiz siwa bose ke

ru-numai mein jo dewen tere ruKHsaron ko

kabhi rona kabhi sar dhunna kabhi chup rahna

kaam karne hain bahut se tere be-karon ko

main ne kaghaz teri taswir ka isa ko diya

nusKHa jun dete hain bimar sab attaron ko

pattharon hi pe tajalli hai to hum ghairat se

aankhon hi mein liye mar jaenge nazzaron ko

sab namuna hai haqiqat ka jahan tak hai majaz

nas jo karte hain gulzaron ki diwaron ko

ye ghazal KHidmat-e-nawwab ki hai mir-'raza'

aur ek dusri kah dijiye ham-karon ko