maut ke hathon to mera ye badan mar jaega

maut ke hāthoñ to merā ye badan mar jā.egā

maiñ magar us din marūñgā jab ye man mar jā.egā

sar-nigūñ haiñ sūliyāñ mere lahū ke sāmne

tum samajhte the ki merā bāñkpan mar jā.egā

sarhadī paTTī pe us kī laash pahchānegā kaun

jo vatan kī sar-zamīñ par be-vatan mar jā.egā

merī qurbānī zarūrī hai agar zinda rahā

jaan dene kā salīqa aur fan mar jā.egā

chāñd maarī kījiye lekin gulāboñ par nahīñ

aaj to ḳhushbū maregī kal chaman mar jā.egā

dekh lījegā anāḌī bāġhbāñ ke haath se

khurpiyoñ ke zaḳhm khā khā kar chaman mar jā.egā

duur āñkhoñ se na jā ab ai sarāb-e-zindagī

dard ke sahrā meñ aashā kā hiran mar jā.egā

rāj-naitik baniye gar DanDī yuuñ hī maarā kiye

har adālat meñ tarāzū kā chalan mar jā.egā

dījiye tahzīb ko taaza havā varna habīb

'mīr' ke ash.ār 'mīrā' kā bhajan mar jā.egā

barq se 'panchhī' nasheman ko bachāne ke liye

ek Thokar maar dūñgā to gagan mar jā.egā

maut ke hathon to mera ye badan mar jaega

main magar us din marunga jab ye man mar jaega

sar-nigun hain suliyan mere lahu ke samne

tum samajhte the ki mera bankpan mar jaega

sarhadi paTTi pe us ki lash pahchanega kaun

jo watan ki sar-zamin par be-watan mar jaega

meri qurbani zaruri hai agar zinda raha

jaan dene ka saliqa aur fan mar jaega

chand mari kijiye lekin gulabon par nahin

aaj to KHushbu maregi kal chaman mar jaega

dekh lijega anaDi baghban ke hath se

khurpiyon ke zaKHm kha kha kar chaman mar jaega

dur aankhon se na ja ab ai sarab-e-zindagi

dard ke sahra mein aasha ka hiran mar jaega

raj-naitik baniye gar DanDi yun hi mara kiye

har adalat mein taraazu ka chalan mar jaega

dijiye tahzib ko taza hawa warna habib

'mir' ke ashaar 'mira' ka bhajan mar jaega

barq se 'panchhi' nasheman ko bachane ke liye

ek Thokar mar dunga to gagan mar jaega