maut ki zad ka KHatar har fard ko har ghar mein hai

maut kī zad kā ḳhatar har fard ko har ghar meñ hai

ye baḌā ik aib ai duniyā tirī chausar meñ hai

manzil-e-maqsūd par pahuñche to pahuñche kis tarah

DhūñDne vaalā umīd-o-bīm ke chakkar meñ hai

shaiḳh se kuchh zid nahīñ hai barhaman se kad nahīñ

dair o ka.aba donoñ kā jauhar mire sāġhar meñ hai

fikr-e-imroz o ġham-e-fardā sarāsar be-mahal

tū agar ghar meñ hai to sab kuchh hamāre ghar meñ hai

dam-ba-ḳhud fitne haiñ un kī shoḳhi-e-raftār se

ek sannāTe kā aalam arsa-e-mahshar meñ hai

merī hī rūdād-e-vahshat sun ke fariyādī haiñ sab

chaak mere hī jigar kā dāman-e-mahshar meñ hai

naqsh-e-ulfat miT gayā to dāġh-e-ulfat haiñ bahut

shukr kar ai dil ki tere ghar kī daulat ghar meñ hai

is se kyā matlab ki hai kis kis ke dil meñ shauq-e-qatl

dekhnā ye hai ki dam kitnā tire ḳhanjar meñ hai

silsila āvārgī kā fahm se bāhar hai 'josh'

maiñ bhī chakkar meñ huuñ merī aql bhī chakkar meñ hai

maut ki zad ka KHatar har fard ko har ghar mein hai

ye baDa ek aib ai duniya teri chausar mein hai

manzil-e-maqsud par pahunche to pahunche kis tarah

DhunDne wala umid-o-bim ke chakkar mein hai

shaiKH se kuchh zid nahin hai barhaman se kad nahin

dair o kaba donon ka jauhar mere saghar mein hai

fikr-e-imroz o gham-e-farda sarasar be-mahal

tu agar ghar mein hai to sab kuchh hamare ghar mein hai

dam-ba-KHud fitne hain un ki shoKHi-e-raftar se

ek sannaTe ka aalam arsa-e-mahshar mein hai

meri hi rudad-e-wahshat sun ke fariyaadi hain sab

chaak mere hi jigar ka daman-e-mahshar mein hai

naqsh-e-ulfat miT gaya to dagh-e-ulfat hain bahut

shukr kar ai dil ki tere ghar ki daulat ghar mein hai

is se kya matlab ki hai kis kis ke dil mein shauq-e-qatl

dekhna ye hai ki dam kitna tere KHanjar mein hai

silsila aawargi ka fahm se bahar hai 'josh'

main bhi chakkar mein hun meri aql bhi chakkar mein hai