maut sirf is liye gawara hai

maut sirf is liye gavārā hai

zindagī kī taraf ishāra hai

rāhat-e-ġham na raas aa.ī mujhe

jab se ehsās-e-ġham ne maarā hai

zindagī bhī aziiz hai lekin

terā ġham zindagī se pyārā hai

dil ko ummīd ne Duboyā thā

tark-e-ummīd ne ubhārā hai

zindagī kā kuchh e.atibār nahīñ

zindagī sub.h kā sitārā hai

jo Thahar jaa.e un ke jalvoñ par

vo nazar ḳhud bhī ik nazārā hai

talḳhī-e-ġham burī balā hai magar

talḳhī-e-ġham mujhe gavārā hai

vaqt kī dhaḌkanoñ kā raaz 'atīq'

mere sheroñ se āshkārā hai

maut sirf is liye gawara hai

zindagi ki taraf ishaara hai

rahat-e-gham na ras aai mujhe

jab se ehsas-e-gham ne mara hai

zindagi bhi aziz hai lekin

tera gham zindagi se pyara hai

dil ko ummid ne Duboya tha

tark-e-ummid ne ubhaara hai

zindagi ka kuchh eatibar nahin

zindagi subh ka sitara hai

jo Thahar jae un ke jalwon par

wo nazar KHud bhi ek nazara hai

talKHi-e-gham buri bala hai magar

talKHi-e-gham mujhe gawara hai

waqt ki dhaDkanon ka raaz 'atiq'

mere sheron se aashkara hai