maut us bekas ki ghayat hi sahi

maut us bekas kī ġhāyat hī sahī

umr bhar jis ne musībat hī sahī

husn kā anjām dekheñ ahl-e-husn

ishq merā be-haqīqat hī sahī

zindagī hai chashm-e-ibrat meñ abhī

kuchh nahīñ to aish-o-ishrat hī sahī

dekh letā huuñ tabassum husn kā

ġham-parastī merī fitrat hī sahī

parda-dār-e-sādgī hai har adā

ye tasanño be-zarūrat hī sahī

darpai-e-āzār hai qismat to ho

ab mujhe tum se mohabbat hī sahī

hūr-e-be-jā kī talāfī kuchh to kar

ḳhair iz.hār-e-nadāmat hī sahī

ai ajal kuchh zindagī kā haq bhī hai

zindagī terī amānat hī sahī

kyā karūñ 'akbar' dilī jazbāt ko

is taġhazzul meñ qadāmat hī sahī

maut us bekas ki ghayat hi sahi

umr bhar jis ne musibat hi sahi

husn ka anjam dekhen ahl-e-husn

ishq mera be-haqiqat hi sahi

zindagi hai chashm-e-ibrat mein abhi

kuchh nahin to aish-o-ishrat hi sahi

dekh leta hun tabassum husn ka

gham-parasti meri fitrat hi sahi

parda-dar-e-sadgi hai har ada

ye tasanno be-zarurat hi sahi

darpai-e-azar hai qismat to ho

ab mujhe tum se mohabbat hi sahi

hur-e-be-ja ki talafi kuchh to kar

KHair izhaar-e-nadamat hi sahi

ai ajal kuchh zindagi ka haq bhi hai

zindagi teri amanat hi sahi

kya karun 'akbar' dili jazbaat ko

is taghazzul mein qadamat hi sahi