maza deta hai yaad aa kar tera bismil bana dena

maza detā hai yaad aa kar tirā bismil banā denā

lagā denā zarā tīr-e-nazar haañ phir lagā denā

vo merā be-ḳhudī meñ us ke muñh se muñh milā denā

qayāmat ek chup kā phir vo donoñ ko sazā denā

adā-e-sharm ho ḳhalvat meñ yā andāz shoḳhī ke

tire har naaz par ham ko to jaañ ai dilrubā denā

hamārā ārzū-e-bosa karnā tujh se dar-parda

tirā dushnām denā aur kyā kyā barmalā denā

sifārish ham-damoñ kī un kā jaate vaqt ye kahnā

ki jab taḌpe mirī tasvīr siine se lagā denā

na hone paa.e vāqif lazzat-e-ta.azīr se dushman

mazāhir chand ho us kī magar ham ko sazā denā

udhar us lab se niklā shoḳh chitvan ko na denā dil

udhar chashm-e-suḳhan-go ne ishāroñ meñ kahā denā

laboñ se lab milā leñ vasl meñ siine se yā siina

magar mumkin nahīñ us but ke dil se dil milā denā

agar ahd-e-vafā se tū bhī phir jaa.e mohabbat meñ

'hijāb' us shoḳh ko mālūm ho jaa.e daġhā denā

maza deta hai yaad aa kar tera bismil bana dena

laga dena zara tir-e-nazar han phir laga dena

wo mera be-KHudi mein us ke munh se munh mila dena

qayamat ek chup ka phir wo donon ko saza dena

ada-e-sharm ho KHalwat mein ya andaz shoKHi ke

tere har naz par hum ko to jaan ai dilruba dena

hamara aarzu-e-bosa karna tujh se dar-parda

tera dushnam dena aur kya kya barmala dena

sifarish ham-damon ki un ka jate waqt ye kahna

ki jab taDpe meri taswir sine se laga dena

na hone pae waqif lazzat-e-tazir se dushman

mazahir chand ho us ki magar hum ko saza dena

udhar us lab se nikla shoKH chitwan ko na dena dil

udhar chashm-e-suKHan-go ne ishaaron mein kaha dena

labon se lab mila len wasl mein sine se ya sina

magar mumkin nahin us but ke dil se dil mila dena

agar ahd-e-wafa se tu bhi phir jae mohabbat mein

'hijab' us shoKH ko malum ho jae dagha dena