maza kya jo yunhi sahar ho gai

mazā kyā jo yūñhī sahar ho ga.ī

nahīñ bhī pahar-do-pahar ho ga.ī

tire ġham meñ shab yuuñ basar ho ga.ī

ġharaz rote rote sahar ho ga.ī

na ā.īna har vaqt dekhā karo

kahoge kisī kī nazar ho ga.ī

jo bāñdhī kamar qatl-e-ushshāq par

kamar to na thī par kamar ho ga.ī

sabab un kī ranjish kā kahnā nahīñ

koī pūchhe kis baat par ho ga.ī

laboñ par Thaharne se ai jaañ! husūl

idhar aa ga.ī yā udhar ho ga.ī

koī baat ulfat kī ab to nahīñ

jo kuchh ho ga.ī peshtar ho ga.ī

tirā va.ada go jhuuT hī kyuuñ na ho

tasallī hamārī magar ho ga.ī

taġhāful hai har baat par kis liye

mire dil kī tujh ko ḳhabar ho ga.ī

qayāmat ke āsār bhī ho ga.e

shab-e-ġham darāz is qadar ho ga.ī

manānā rulānā hī bāham rahā

shab-e-vasl yūñhī sahar ho ga.ī

nahīñ kyā karoge na ham ko sunāo

shikāyat adū kī magar ho ga.ī

ḳhudā hai jo is but se phir ho milāp

ġharaz aaj to is qadar ho ga.ī

kahā bhī to us ne kuchh aisā nahīñ

zarā baat meñ chashm tar ho ga.ī

na maanā na maanā usī shoḳh ne

ki duniyā udhar kī idhar ho ga.ī

tumheñ zid na milne kī hai kis liye

mirī aah kyā be-asar ho ga.ī

vo va.ade se kyuuñ phir ga.e kah tū kuchh

ye kyā baat ai nāma-bar ho ga.ī

ye qismat huā vasl bhī gar nasīb

to ranjish bhī har baat par ho ga.ī

vo aa.e bhī yaañ us se ai dil husūl

koī dam ko taskīñ agar ho ga.ī

tire ġham meñ ye haal to ho gayā

ḳhushī ab tirī fitnagar ho ga.ī

ye jhūTī mohabbat se un kī husūl

shikāyat adū kī agar ho ga.ī

unheñ sulh manzūr hai mujh se kab

kahūñ kyā huī kyūñki par ho ga.ī

nizām us ghaḌī kā kahūñ haal kyā

jab us ne kahā vo sahar ho ga.ī

maza kya jo yunhi sahar ho gai

nahin bhi pahar-do-pahar ho gai

tere gham mein shab yun basar ho gai

gharaz rote rote sahar ho gai

na aaina har waqt dekha karo

kahoge kisi ki nazar ho gai

jo bandhi kamar qatl-e-ushshaq par

kamar to na thi par kamar ho gai

sabab un ki ranjish ka kahna nahin

koi puchhe kis baat par ho gai

labon par Thaharne se ai jaan! husul

idhar aa gai ya udhar ho gai

koi baat ulfat ki ab to nahin

jo kuchh ho gai peshtar ho gai

tera wada go jhuT hi kyun na ho

tasalli hamari magar ho gai

taghaful hai har baat par kis liye

mere dil ki tujh ko KHabar ho gai

qayamat ke aasar bhi ho gae

shab-e-gham daraaz is qadar ho gai

manana rulana hi baham raha

shab-e-wasl yunhi sahar ho gai

nahin kya karoge na hum ko sunao

shikayat adu ki magar ho gai

KHuda hai jo is but se phir ho milap

gharaz aaj to is qadar ho gai

kaha bhi to us ne kuchh aisa nahin

zara baat mein chashm tar ho gai

na mana na mana usi shoKH ne

ki duniya udhar ki idhar ho gai

tumhein zid na milne ki hai kis liye

meri aah kya be-asar ho gai

wo wade se kyun phir gae kah tu kuchh

ye kya baat ai nama-bar ho gai

ye qismat hua wasl bhi gar nasib

to ranjish bhi har baat par ho gai

wo aae bhi yan us se ai dil husul

koi dam ko taskin agar ho gai

tere gham mein ye haal to ho gaya

KHushi ab teri fitnagar ho gai

ye jhuTi mohabbat se un ki husul

shikayat adu ki agar ho gai

unhen sulh manzur hai mujh se kab

kahun kya hui kyunki par ho gai

nizam us ghaDi ka kahun haal kya

jab us ne kaha wo sahar ho gai