maze ishq ke kuchh wahi jaante hain

maze ishq ke kuchh vahī jānte haiñ

ki jo maut ko zindagī jānte haiñ

shab-e-vasl liiñ un kī itnī balā.eñ

ki hamdam mire haath hī jānte haiñ

na ho dil to kyā lutf-e-āzār-o-rāhat

barābar ḳhushī nā-ḳhushī jānte haiñ

jo hai mere dil meñ unhīñ ko ḳhabar hai

jo maiñ jāntā huuñ vahī jānte haiñ

paḌā huuñ sar-e-bazm maiñ dam churā.e

magar vo ise be-ḳhudī jānte haiñ

kahāñ qadr-e-ham-jins ham-jins ko hai

farishtoñ ko bhī aadmī jānte haiñ

kahūñ hāl-e-dil to kaheñ us se hāsil

sabhī ko ḳhabar hai sabhī jānte haiñ

vo nādān anjān bhole haiñ aise

ki sab sheva-e-dushmanī jānte haiñ

nahīñ jānte is kā anjām kyā hai

vo marnā merā dil-lagī jānte haiñ

samajhtā hai tū 'dāġh' ko rind zāhid

magar rind us ko valī jānte haiñ

maze ishq ke kuchh wahi jaante hain

ki jo maut ko zindagi jaante hain

shab-e-wasl lin un ki itni balaen

ki hamdam mere hath hi jaante hain

na ho dil to kya lutf-e-azar-o-rahat

barabar KHushi na-KHushi jaante hain

jo hai mere dil mein unhin ko KHabar hai

jo main jaanta hun wahi jaante hain

paDa hun sar-e-bazm main dam churae

magar wo ise be-KHudi jaante hain

kahan qadr-e-ham-jins ham-jins ko hai

farishton ko bhi aadmi jaante hain

kahun haal-e-dil to kahen us se hasil

sabhi ko KHabar hai sabhi jaante hain

wo nadan anjaan bhole hain aise

ki sab shewa-e-dushmani jaante hain

nahin jaante is ka anjam kya hai

wo marna mera dil-lagi jaante hain

samajhta hai tu 'dagh' ko rind zahid

magar rind us ko wali jaante hain