zara si baat pe nam-dida hua karte the

zarā sī baat pe nam-dīda huā karte the

ham bhī kyā sāda-o-pechīda huā karte the

'aks-bandī kī havas in meñ kahāñ se aa.ī

mehrbāñ haath to nādīda huā karte the

ab hameñ dekh ke lagtā to nahīñ hai lekin

ham kabhī us ke pasandīda huā karte the

tū ne kis mauj meñ ye haal kiyā hai apnā

log kyā kyā tire girvīda huā karte the

tujh se pahle bhī mire raaz the ik shaḳhs ke paas

farq itnā hai ki poshīda huā karte the

sāhib-ur-rā.e kahāñ itne baham the pahle

ye chunīda to bahut chīda huā karte the

un dinoñ itne vasā.il nahīñ hote the magar

phir bhī kuchh log jahāñ-dīda huā karte the

zara si baat pe nam-dida hua karte the

hum bhi kya sada-o-pechida hua karte the

'aks-bandi ki hawas in mein kahan se aai

mehrban hath to nadida hua karte the

ab hamein dekh ke lagta to nahin hai lekin

hum kabhi us ke pasandida hua karte the

tu ne kis mauj mein ye haal kiya hai apna

log kya kya tere girwida hua karte the

tujh se pahle bhi mere raaz the ek shaKHs ke pas

farq itna hai ki poshida hua karte the

sahib-ur-rae kahan itne baham the pahle

ye chunida to bahut chida hua karte the

un dinon itne wasail nahin hote the magar

phir bhi kuchh log jahan-dida hua karte the