mera nishan bhi DhunDh ghubar-e-mah-o-aKHtar mein

merā nishāñ bhī DhūñDh ġhubār-e-māh-o-aḳhtar meñ

kuchh manzar maiñ ne bhī banā.e banā.e haiñ manzar meñ

pūchho to zaḳhmoñ kā havāla denā mushkil hai

itnī be-tartībī sī hai dil ke daftar meñ

vo maujoñ kī tesha-zanī se gūñjtī chaTTāneñ

vo patthar sī raat kā Dhalnā chāñd ke paikar meñ

itnā yaad hai jab maiñ chalā thā sū-e-dasht-e-balā

maujeñ mārtā ik dariyā bahtā thā barābar maiñ

chamak rahā hai ḳhema-e-raushan duur sitāre sā

dil kī kashtī tair rahī hai khule samundar meñ

'zeb' mujhe Dar lagne lagā hai apne ḳhvāboñ se

jāgte jāgte dard rahā kartā hai mire sar meñ

mera nishan bhi DhunDh ghubar-e-mah-o-aKHtar mein

kuchh manzar main ne bhi banae banae hain manzar mein

puchho to zaKHmon ka hawala dena mushkil hai

itni be-tartibi si hai dil ke daftar mein

wo maujon ki tesha-zani se gunjti chaTTanen

wo patthar si raat ka Dhalna chand ke paikar mein

itna yaad hai jab main chala tha su-e-dasht-e-bala

maujen marta ek dariya bahta tha barabar main

chamak raha hai KHema-e-raushan dur sitare sa

dil ki kashti tair rahi hai khule samundar mein

'zeb' mujhe Dar lagne laga hai apne KHwabon se

jagte jagte dard raha karta hai mere sar mein