mere ashkon ne kai aankhon mein jal-thal kar diya

mere ashkoñ ne ka.ī āñkhoñ meñ jal-thal kar diyā

ek pāgal ne bahut logoñ ko pāgal kar diyā

apnī palkoñ par sajā kar mere aañsū aap ne

rāste kī dhuul ko āñkhoñ kā kājal kar diyā

maiñ ne dil de kar use kī thī vafā kī ibtidā

us ne dhoka de ke ye qissa mukammal kar diyā

ye havā.eñ kab nigāheñ pher leñ kis ko ḳhabar

shohratoñ kā taḳht jab TuuTā to paidal kar diyā

devtāoñ aur ḳhudāoñ kī lagā.ī aag ne

dekhte hī dekhte bastī ko jañgal kar diyā

zaḳhm kī sūrat nazar aate haiñ chehroñ ke nuqūsh

ham ne ā.īnoñ ko tahzīboñ kā maqtal kar diyā

shahr meñ charchā hai āḳhir aisī laḌkī kaun hai

jis ne achchhe-ḳhāse ik shā.ir ko pāgal kar diyā

mere ashkon ne kai aankhon mein jal-thal kar diya

ek pagal ne bahut logon ko pagal kar diya

apni palkon par saja kar mere aansu aap ne

raste ki dhul ko aankhon ka kajal kar diya

main ne dil de kar use ki thi wafa ki ibtida

us ne dhoka de ke ye qissa mukammal kar diya

ye hawaen kab nigahen pher len kis ko KHabar

shohraton ka taKHt jab TuTa to paidal kar diya

dewtaon aur KHudaon ki lagai aag ne

dekhte hi dekhte basti ko jangal kar diya

zaKHm ki surat nazar aate hain chehron ke nuqush

hum ne aainon ko tahzibon ka maqtal kar diya

shahr mein charcha hai aaKHir aisi laDki kaun hai

jis ne achchhe-KHase ek shair ko pagal kar diya