mere girya se na aazar uThane se hua

mere girya se na āzār uThāne se huā

fāsla tai na.ī dīvār uThāne se huā

varna ye qissa bhalā ḳhatm kahāñ honā thā

dāstāñ se mirā kirdār uThāne se huā

mahmil-e-nāz kī tāḳhīr kā ye saarā fasād

rāh-e-uftād ko bekār uThāne se huā

shaaq guzrā hai jo ahbāb ko vo sadma bhī

bazm meñ misra-e-tahdār uThāne se huā

yuuñ to mus.haf bhī uThā.e ga.e qasmeñ bhī magar

āḳhirī faisla talvār uThāne se huā

ġham nahīñ taḳht ko aur baḳht ko kho dene kā

kab mirā honā bhī dastār uThāne se huā

jāgnā thā mirā hañgāma-e-hastī kā sabab

hashr barpā bhī digar-bār uThāne se huā

gosha-e-bāġh huā ḳhuld guzarne se tire

ā.īna aks-e-ruḳh-e-yār uThāne se huā

mere girya se na aazar uThane se hua

fasla tai nai diwar uThane se hua

warna ye qissa bhala KHatm kahan hona tha

dastan se mera kirdar uThane se hua

mahmil-e-naz ki taKHir ka ye sara fasad

rah-e-uftad ko bekar uThane se hua

shaq guzra hai jo ahbab ko wo sadma bhi

bazm mein misra-e-tahdar uThane se hua

yun to mushaf bhi uThae gae qasmen bhi magar

aaKHiri faisla talwar uThane se hua

gham nahin taKHt ko aur baKHt ko kho dene ka

kab mera hona bhi dastar uThane se hua

jagna tha mera hangama-e-hasti ka sabab

hashr barpa bhi digar-bar uThane se hua

gosha-e-bagh hua KHuld guzarne se tere

aaina aks-e-ruKH-e-yar uThane se hua