mere KHush-aind-mustaqbil ka paighambar bhi tu

mere ḳhush-ā.ind-mustaqbil kā paiġhambar bhī tū

merī barbādī kā merī jaan pas-manzar bhī tū

tū ki fitrat kī tarah hai kis tarah tasḳhīr ho

yaar ḳhush-manzar bhī tū ziddī bhī tū ḳhud-sar bhī tū

ik tazād-e-husn-e-ma.anī hai tirī ta.amīr meñ

dastaras meñ bhī giraft-e-vaqt se bāhar bhī tū

tere chehre se ayaañ us ke na milne kā alam

ḳhush-nazar aatā nahīñ us shaḳhs se mil kar bhī tū

mere fan kī saarī zebā.ish tirī nisbat se hai

jo chhupā hai mere sheroñ meñ vo dānish-var bhī tū

ruuh to pahle bhī thī ab ke badan bhī hai asiir

ab to yuuñ lagtā hai jaise ho mirā paikar bhī tū

tū hī sañg-e-mīl hai apne liye sultān-'rashk'

apne hī raste meñ jo haa.il hai vo patthar bhī tū

mere KHush-aind-mustaqbil ka paighambar bhi tu

meri barbaadi ka meri jaan pas-manzar bhi tu

tu ki fitrat ki tarah hai kis tarah tasKHir ho

yar KHush-manzar bhi tu ziddi bhi tu KHud-sar bhi tu

ek tazad-e-husn-e-mani hai teri tamir mein

dastaras mein bhi giraft-e-waqt se bahar bhi tu

tere chehre se ayan us ke na milne ka alam

KHush-nazar aata nahin us shaKHs se mil kar bhi tu

mere fan ki sari zebaish teri nisbat se hai

jo chhupa hai mere sheron mein wo danish-war bhi tu

ruh to pahle bhi thi ab ke badan bhi hai asir

ab to yun lagta hai jaise ho mera paikar bhi tu

tu hi sang-e-mil hai apne liye sultan-'rashk'

apne hi raste mein jo hail hai wo patthar bhi tu